ABŞ Prezidenti Donald Tramp idxala yönəlik qarşılıqlı tariflərin tətbiqini nəzərdə tutan sərəncam imzaladıqdan sonra "Brent" neftin qiyməti 70 dollardan aşağı düşüb. ABŞ hakimiyyətinin bir çox ticarət tərəfdaşından idxal edilən mallara ən azı 10 faiz vergi tətbiq edəcəyini açıqlaması qlobal ticarət müharibələrinin dərinləşərək neft tələbatını məhdudlaşdıracağına dair narahatlıqları artırıb.
Bu qərarların və onların mümkün nəticələrinin yalnız neft bazarlarına deyil, ümumilikdə qlobal iqtisadiyyata və ticarətə mənfi təsir edəcəyi təhlükəsi var.
Trampın "qurtuluş günü" adlandırdığı 2 aprel tarixində verdiyi qərarlar nəticəsində aprel tarixində "Brent" nefti 5,4% dəyər itirərək 69,63 dollara düşdü. Bu 2023-cü ilin oktyabrından bəri ən böyük günlük itkidir. Eyni gündə WTI markalı neftin qiyməti 5,6% azalaraq 66,33 dollara enmişdi. Bu gün isə “Brent” markalı neftin iyun fyuçerslərinin qiyməti 66,68 ABŞ dolları təşkil edib.
Neft bazarında çalxalanma Azərbaycanın "qara qızıl"ına da təsirsiz ötüşməyib. Bu gün dünya bazarında "Azeri Light" markalı Azərbaycan neftinin 1 barelinin qiyməti 1,5 ABŞ dolları, yaxud 2,15 % azalaraq 68,14 ABŞ dolları təşkil edib.
Neftin qiymətinin kəskin ucuzlaşmasının Azərbaycan iqtisadiyyatına təsiri müzakirə edilir.
Modern.az-a danışan Milli Məclisin deputatı Aydın Hüseynov bildirib ki, neftin qiymətinin enməsi Azərbaycan büdcəsinə təsir etməyəcək.
“Azərbaycan büdcəsində neftin qiyməti 70 dollar nəzərdə tutulub. Ümumən proqnozlaşdırılır ki, neftin qiyməti 45 dollara qədər ensə belə Azərbaycan iqtisadiyyatına və büdcə gəlirlərimizə böyük təsiri olmayacaq. Mən inanmıram ki, neft bu qədər ucuzlaşar”, - o qeyd edib.
Deputatın sözlərinə görə, neftin qiyməti müəyyən aylar üzrə artır və azalır.
"İl ərzində neftin qiymətinin stabil qalacağını hesab edirəm. Digər tərəfdən bizim kifayət qədər valyuta ehtiyatlarımız mövcuddur. Qeyri-neft sektorundan əldə olunan gəlirlər də kifayət qədər büdcəmizdə əksini tapır. Ona görə də neftin müəyyən qədər ucuzlaşması ölkə iqtisadiyyatına önəmli əks təsir etməyəcək".
