Beynəlxalq analitiklərin proqnozlarına görə, əgər ABŞ lideri Donald Tramp gömrük tariflərini azaldarsa, dünya iqtisadiyyatı resessiyadan yan keçərsə, o zaman neftin qiyməti 2025-ci ildə 62 dollara bərabər ola bilər.

Bunu Modern.az-a açıqlamasında Milli Məclisin deputatı Tahir Mirkişili bildirib.

“Əks halda isə 2025-ci ilin sonuna kimi neftin qiyməti bir barel üçün 50 dollara düşə bilər, - T.Mirkişili qeyd edib.

O xatırladıb ki, Azərbaycanın 2025-ci il üçün dövlət büdcəsi qəbul edilərkən hesablamalar neftin qiymətinin baza qiymətinə görə 1 barelə=70 dollar səviyyəsində aparılıb. 

“Eyni zamanda, Maliyyə Nazirliyi tərəfindən pessimist ssenari, yəni neftin qiymətinin 60 dollara düşəcəyi halda bunun dövlət büdcəsinə və Dövlət Neft Fondunun büdcəsinə təsiri də təqdim edilib. Belə ki, qiymətin 60 dollara düşməsi dövlət büdcəsinin gərlilərini 340 milyon manat, Dövlət Neft Fondunun gəlirlərini isə 2.1 milyard manat azalda bilər. Göründüyü kimi, qiymətin 10 dollar düşməsinin dövlət büdcəsi gəlirlərinə azaldıcı təsiri cəmi 0.8%, Dövlət Neft Fondu büdcəsinin gəlirlərinə isə azaldıcı təsiri daha çox, 14.5% təşkil edə bilər.

Bu ilin 1-ci rübünün dövlət büdcəsinin icra göstəriciləri göstərir ki, hazırda dövlət büdcəsində 1.6 mlrd manatlıq profisit var. Verilən proqnozlar əsasında hazırda dövlət büdcəsinin icrası ilə bağlı ciddi risklər görünmür. Azərbaycanın ciddi iqtisadi ehtyatlatı var. Hesab edirəm ki, hadisələrin gedişatına uyğun olaraq tarazlayıcı və əlverişli iqtisadi siyasət icra ediləcək”,- Tahir Mirkişili deyib.