Dünən Bakıda “BYD” markalı taksi maşınının qəzaya uğraması - Ələsgər Qayıbov küçəsindən sürətlə hərəkət edərək Heydər Əliyev prospektinə "uçaraq" beton maneəyə çırpılması ən çox müzakirə olunan mövzulardandır.

Gündəmi zəbt edən bu olay “Embawood” şirkətinin işinə yarayıb. Belə ki, şirkət bədbəxt hadisədən özünə reklam qazanmağa çalışıb.

Mebel satışı ilə məşğul olan “Embawood” qəzadan görüntüləri montaj edərək “Belə sürətlə, həm də təhlükəsiz - sifarişiniz ən qısa zamanda qapınızda!” başlığı ilə paylaşıb.

Şirkətin paylaşımı sosial şəbəkələrdə və mediada qınaqla qarşılanıb və tənqidlərə səbəb olub. Bununla bağlı müzakirələrə qoşulanlar “Embawood” şirkətini öz mənafeyi naminə ucuz yola getməkdə suçlayıblar.

Fakta münasibət bildirən iqtisadçı ekspert Natiq Cəfərli Modern.az-a bildirib ki, özəl şirkətlər belə addımlara görə özləri risk daşıyır:

“İnsanlar reklamı bəyənməyəcəklərsə, onların məhsulundan imtina edəcəklər. Təəssüf ki, elə bir trend yaranıb ki, gündəmdə olan istənilən məsələ ilə bağlı onu reklam fürsətinə çevirmək cəhdləri yaranır. Şirkətlər tərəfindən biz belə halları əvvəllər də görmüşük. Mən onların niyyətini anlayıram, onlar gündəmdə olan məsələni virus kimi yayılacaq reklam kampaniyasına çevirmək istəyirlər. İndi hər şey insanların seçimindən asılıdır. İnsanlar bundan narazılıq etsələr, reklamı qəbul etməsələr “Embawood”un məhsullarını boykot edəcəklər. Əgər bu məsələdə hansısa etik qaydalar, qanunvericilik pozulmayıbsa, riskləri biznes qurumu özü daşıyır. Kənardan hansısa müdaxiləni doğru saymıram. Amma vətəndaş qınağı yaranacaqsa, onların satışı azalacaq və gələn dəfə belə səhv etməyəcəklər. Dünyada belə mexanizmlər işləyir”.
 

Azad İstehlakçılar Birliyinin sədri Eyyub Hüseynov qeyd edib ki, “Embawood” şirkəti barədə hər ay 2-3 şikayət alırlar:
 

“Şikayətlər əsasən malların keyfiyyətsizliyi, geri qaytarılması ilə bağlı olur. Təəssüflər olsun ki, “Embawood” şirkəti əvvəllər yaxşı işlədiyi halda getdikcə zəifləyir. İnsanlara pis təsir edən uyğunsuz reklam təqdimatı isə heç doğru deyil. Başqa sözlə, sürücüləri lazım olmayan istiqamətə yönəldirlər. Düşünürəm ki, bu reklam vətəndaşların hüquqlarının pozulmasına gətirib çıxarır”.