“Bank Avrasiya” ASC-nin müştərilərə verdiyi kreditlərin 33,5 faizinin ödənilməsində gecikmələr var.
Modern.az bankın 2025-ci ilin birinci rübü üzrə maliyyə hesabatına əsasən məlumat verir ki, gecikmiş kreditlərin ümumi məbləği 36 milyon 746 min manata çatıb.
Bankın ümumi kredit portfeli 109 milyon 581 min manatdır. Bu məbləğin 66,5 faizi və ya 72 milyon 835 min manatı 1–30 gün aralığında, yəni cari öhdəliklər üzrə ödənilən kreditlərdir. Gecikdirilmiş kreditlərin 9 milyon 932 min manatının ödəmə müddəti 1 ildən çox keçib.
Bank sahibkarlara 60 milyon 245 min manat məbləğində kredit ayırıb. Biznes subyektləri bu məbləğin 28 milyon 599 manatının qaytarılmasını gecikdirir ki, bu da ayrılmlış biznes kreditlərinin 47,5 faizini təşkil edir.
İstehlak kreditlərinin ümumi məbləği 7 milyon 719 min manatdır. Bu kreditlərdən 5 milyon 286 min manatlıq hissəsi və ya 68,5 faizi gecikdirilib.
Bankın daşınmaz əmlak kreditlərinin ümumi məbləği 41 milyon 616 min manat təşkil edir. Bu kreditlərin 38 milyon 755 min manatlıq hissəsi cari vəziyyətdədir və vaxtında ödənilir. Gecikdirilmiş kreditlərin məbləği isə 2 milyon 861min manatdır. Bu da daşınmaz əmlak üzrə verilmiş kreditlərin 6,9 faizini təşkil edir.
