Sabah Azərbaycanda Yel çərşənbəsidir.

Modern.az xəbər verir ki, xalq təqvimi ilə Yel çərşənbəsi Novruz bayramının yaxınlaşmasından xəbər verən 3-cü çərşənbədir.

İnanclara görə, Yel çərşənbəsinin gətirdiyi isti küləklər yazın gəlişini yaxınlaşdırır, təbiəti isindirir.
 
Ona xalq arasında "Küləkli çərşənbə" də deyilir. 

Novruz şənliklərində icra olunan "Yel baba" mərasimi öz kökü etibarilə qədim əcdadlarımızın Yel tanrısına etiqadı ilə bağlıdır.  

A Yel baba,
Yel baba,
Tez gəl, baba, gəl, baba.
Sovur bizim xırmanı,
Atına ver samanı.
Dən dağılıb dağ olsun,
Yel babamız sağ olsun.
A Yel baba, Yel baba,
Qurban sənə, gəl baba.

İnanclara görə, Yel çərşənbəsi gecəsi söyüd ağacının altına gedib niyyət edib Yel babanı çağırmalısan. Əgər Yel baba sənin səsini eşidib əssə və söyüdün budaqları tərpənsə, diləyin yerinə yetər.
Əski inanclara görə, Yel çərşənbəsində külək bütün dünyanı gəzərək oyanmış suyu və odu hərəkətə gətirir.
Yel xalqımızın mifik təfəkküründə yol göstərən bələdçi rolunu da oynayır. Yel çərşənbəsi həm də ilaxır çərşənbəyə hazırlıq deməkdir. Qədim insanlar küləyin həm də Allah tərəfindən göndərildiyini iddia ediblər. Yəni o, insanları həm əzizləyə, həm də cəzalandıra bilər.
 
Yel çərşənbəsi günü də tonqallar qalanmalıdır.
 
Qeyd edək ki, Novruzun ilk çərşənbəsi - Su çərşənbəsi fevralın 25-də qeyd edilib.

Martın 4-də Od çərşənbəsi qalanıb.

Martın 18-də isə İlaxır çərşənbə - Torpaq çərşənbəsi qeyd olunacaq.

Azərbaycanda bu il yaz fəsli martın 20-si saat 13:01-dən başlayacaq.

Həmin gün gecə ilə gündüz bərabərləşəcək.