"Dövlət Turizm Agentliyi bizi beynəlxalq təşkilatdakı rəhbərlikdən uzaqlaşdırmaq üçün üç il əlindən gələni etdi".

Modern.az xəbər verir ki, bunu Azərbaycan Milli Kulinariya Assosiasiyasının sədri Tahir Əmiraslanov Milli Məclisin İctimai birliklər və dini qurumlar komitəsinin təşkil etdiyi “Qərbi Azərbaycana qayıdış prosesində QHT-lərin rolu” mövzusunda keçirilən ictimai dinləmədə deyib. 

O, qeyd edib ki, mətbəxin vacibliyi hər şeydən üstündür:                                                                                           
"Biz yeni bir kitabın tədqiqatı üçün çalışırıq. İndi biz pul axtaracağıq ki, bu kitabdan çox çap edək, xarici dillərə tərcümə edək. Sponsor axtaracağıq, amma onların da adını kitabda göstərə bilməyəcəyik, çünki bu, qrant layihəsi çərçivəsindədir.
Biz beynəlxalq təşkilatın rəhbərliyinə gəlmişdik. Dövlət Turizm Agentliyi üç il əlindən gələni etdi ki, bizi bu  rəhbərlikdən uzaqlaşdırsın. Biz indi kiməsə yalvaracağıq, amma əvvəl qərar verən biz idik. Əvəzində bizim yerimizə gətirilən təşkilatla bir yerdə 2.9 milyon manat pul silinib ki, guya dünyanın ictimai təşkilatları ilə birlikdə Azərbaycan mətbəxini tanıdırlar. Ona görə bu vəsaitlər QHT-lərə Dövlət Dəstəyi Agentliyi və Qərbi Azərbaycan İcmasına verilməlidir ki, pulu düzgün istiqamətdə istifadə olunsun”.