Azərbaycanın Milli Qəhrəmanı Hökumə Əliyevanın həyatından bəhs edən yeni film hazırlanıb.
Modern.az-ın məlumatına görə, film Əməkdar incəsənət xadimi Ziya Şıxlinski tərəfindən lentə alınıb.
Film “Hökümə – kədərim mənim” adlandırılıb. Məlumata görə, sənədli filmin çəkilişləri başa çatıb.
Hazırda ekran işinin montaj prosesi davam etdirilir. Filmin təqdimatı isə Milli Qəhrəmanın doğum günü ərəfəsində - avqust ayında keçirilməsi planlaşdırılır.
Qeyd edək ki, sənədli film Hökümə Əliyevanın şəxsiyyətinə, mübarizəsinə və ictimai yaddaşda qoyduğu izlərə işıq salmağı hədəfləyir.
Xatırladaq ki, AZAL-a məxsus Bakı-Qroznı aviareysini həyata keçirən sərnişin təyyarəsi dekabrın 25-də Qazaxıstanın Aktau şəhəri yaxınlığında qəzaya uğrayıb. Təyyarənin göyərtəsindəki 67 nəfərdən 38-i həlak olub, 29-u sağ qalıb. Təyyarə Rusiyanın Qroznı üzərindəki hava məkanında baş verən fiziki və texniki xarici müdaxilə nəticəsində qəzaya uğrayıb.
Prezident İlham Əliyevin sərəncamı ilə 29 dekabr 2024-cü il tarixli Sərəncamı ilə Hökumə Əliyeva qəza zamanı xidməti vəzifələrinin yerinə yetirilməsində, sərnişinlərin həyatının xilas edilməsində yüksək peşəkarlıq, şücaət və fədakarlıq göstərdiyinə görə Azərbaycan Respublikasının Milli Qəhrəmanı adına layiq görülüb.
