ABŞ-ın yeni Administrasiyasında vəzifə tutan milyarder İlon Mask dövlət tərəfindən maliyyələşdirilən bəzi media qurumlarının fəaliyyətini dayandırmağa çağırıb. Bu barədə o, özünün sosial media hesabında paylaşım edib.
İlon Mask “Amerikanın Səsi” (Voice of America) və “Azadlıq Radiosu” (Radio Free Europe/Radio Liberty) media layihələrinin bağlanmasını dəstəkləyib. “Bəli, onları bağlayın!”, – Mask yazıb və əlavə edib ki, Avropa artıq azaddır, bu KİV-ləri heç kim dinləmir və onlar “amerikalı vergiödəyicilərinin cibindən ildə 1 milyard dollar yeyirlər”.
Qeyd edək ki, mərkəzi ofisi Çexiyanın paytaxtı Praqada yerləşən “Azadlıq” radiosunun bir sıra xarici ölkələrdə, o cümlədən Azərbaycanda yerli bürosu fəaliyyət göstərir. Həmin büroların fəaliyyətinə isə yayım həyata keçirdikləri keçirdikləri ölkələrdə birmənalı münasibət yoxdur.
Məsələ ilə bağlı Modern.az-a danışan keçmiş deputat Sabir Rüstəmxanlı bildirib ki, “Azadlıq” radiosu vaxtilə onun üçün doğma olub:
“Bir vaxtlar “Azadlıq” radiosu mənim üçün doğma idi. Çünki mənim "Ömür kitabı"mı hissə-hissə efirə verirdi. Bu radio Azərbyacanın müstəqilliyi, bizim Sovetlər birliyindən qopmağımız üçün mübarizə aparırdı. Təəssüflər olsun ki, Azərbaycan müstəqil olandan sonra “Azadlıq” radiosunun əməlində dəyişiklik nəzərə çapdı. Bu dəfə müstəqil Azərbaycan dövlətinə qarşı mövqe nümayiş etdirməyə başladı. Ona görə də indi daha bu radio ilə əməkdaşlığımız yoxdur. Bəzən zəng edib hansısa məsələyə münasibət soruşurlar. İndiki şəraitdə onların mövqeyi mənə o qədər də aydın deyil. Əgər doğrudan da xalqların azadlığı, müstəqilliyini istəyirlərsə, onda gərək bu prinsipləri qorusunlar. Yeni qurulan dövlətin içində ziddiyət yaratmasınlar”.
Sabir Rüstəmxanlı deyib ki, bu gün elə bir dövrə çatmışıq ki, sözdən daha çox, silah rol oynayır.
"Amerikanın yeni prezidenti Donald Trampın siyasi xətti fərqlidir. Özü də çıxışlarında daha çox ABŞ-nin daxili işlərilə məşğul olacağını demişdi. ABŞ-nin Panama kanalı, Qrelandiya adası, Kanada dövləti kimi çoxlu problemləri var. Bəlkə də, bunlar “Azadlıq” radiosunun bağlanmasında əsas rol oynayır. Gizlin alt mənada, dərində nə dayanır, onu mən bilmərəm”.
