Son günlər Rusiya-Azərbaycan münasibətlərində gərginlik müşahidə edilməkdədir. Bu gərginliyin artmasında Rusiya dumasının üzvlərinin, eləcə də media orqanlarının rolu heç də az deyil. Bu gün Azərbaycandakı Rus evi fəaliyyətini dayandırıb. Mətbuatda və sosial şəbəkələrdə Rusiyanın Azərbaycanda fəaliyyət göstərən media qurumlarının da bağlanmasına çağırışlar edilir.
Yerli mətbuatda həmçinin "Sputnik Azərbaycan"ın fəaliyyətinin məhdudlaşdırılacağı bildirilir.
Belə ki, Azərbaycan və Rusiyanın dövlət xəbər agentliklərinin Rusiya və Azərbaycanda təmsilçiliyində mövcud uyğunsuzluğu aradan qaldırmaq üçün müvafiq olaraq, “Azərtac”ın Rusiyadakı müxbirləri qədər “Rossiya seqodnya”nın müxbirləri də ölkəmizdə işləyəcək.
Qeyd edək ki, “Rossiya seqodnya”nın Bakı bölməsinin işinə 40-a yaxın şəxs cəlb olunub. Filialın özünün isə ləğvi gözlənilir - “Rossiya seqodnya” Azərbaycanda işini bir müxbirlə davam etdirəcək və onun fəaliyyəti Azərbaycan Respublikasının qanunvericiliyinə və Rusiya Federasiyası və Azərbaycan Respublikası hökumətləri arasında KİV müxbirlərinin statusu haqqında 9 yanvar 2001-ci il tarixli sazişə uyğun olaraq tənzimlənəcək.
Modern.az-a açıqlamasında Milli Məclisin deputatı Elçin Mirzəbəyli bildirib ki, "Sputnik Azərbaycan"ın informasiya təhlükəsizliyinə hər zaman təhdid hesab edib:
“Sputnik-Azərbaycan” Azərbaycanın qatı düşməni olan Marqarita Simonyanın baş redaktor vəzifəsində çalışdığı “Rossiya seqodnya” beynəlxalq informasiya ağentliyi Federal Dövlət Unitar müəssisənin Bakı filialıdır. Yəni Rusiyanın dövlət resursunun törəmə müəsisəsidir. “Media haqqında” qanunun 11.2-ci maddəsində qeyd olunur ki, Azərbaycan Respublikasında xarici media subyektlərinin filial və nümayəndəlikləri Azərbaycan Respublikasının tərəfdar çıxdığı beynəlxalq müqavilələrdə nəzərdə tutulmuş hallarda açılır. Həmçinin eyni qanunun 69.2-ci maddəsində bildirilir ki, “xarici ölkələrin hüquqi və fiziki şəxsləri çap mediası və onlayn media subyektlərinin hər bir məhsulunun yalnız 25 (iyirmi beş) faizədək olan hissəsinə sponsorluq edə bilərlər”. Qeyd edim ki, Sputnik.az domeninin sahibi də “Rossiya seqodnya” beynəlxalq informasiya agentliyi” Federal Dövlət Unitar müəssisəsidir. Doğrusu, “Sputnika Azərbaycan”ın necə maliyyələşdirilməsi haqqında məlumatlı deyiləm. Əgər, sözügedən media resursunun məhsulu və təbii ki, bu məhsulun ərsəyə gətirilməsi üçün zəruri olan fəaliyyətin 25%-dən çoxu xaricdən, yəni Rusiyadan maliyyələşirsə, o zaman bu, ciddi qanun pozuntusudur. Bütövlükdə isə, sözügedən resursun Azərbaycanın informasiya təhlükəsizliyinə hər zaman təhdid hesab etmişəm və bu gün də eyni fikirdəyəm. “Sputnik.az” domen adının sahibinin kim olmasından, həmçinin hansı dillərdə yayımlanmasından asılı olmayaraq, bu resurs Azərbaycanın informasiya məkanında fəaliyyət göstərir və milli domen adı daşıdığı üçün tamamilə ölkəmizin qanunvericiliyinə tabe olmalı, ölkəmizin milli maraqlarına, başqa dövlətlərin suverenliyi və ərazi bütövlüyü ilə bağlı Azərbaycanın rəsmi mövqeyinə zidd informasiyalar yaymamalıdır. Amma biz bunun əksini müşahidə edirik və hesab edirəm ki, belə bir resursun ölkəmizdə fəaliyyət göstərməsinə heç bir lüzum yoxdur".
Deputat eyni yanaşmanın BBC-yə (“BBC News Azərbaycanca”) və digər resurslara da şamil edilməsini zəruri sayır:
"BBC də bəlli olduğu kimi, Azərbaycana düşmən kəsilən USAID-in maliyyələşdirdiyi təsisatlardan biridir.
Azərbaycanda xarici ölkələrin jurnalistləri “Media haqqında” qanunun 11-ci maddəsinin tələblərinə uyğun olaraq, akkreditasiyadan keçməklə, ölkəmizin qanunlarına uyğun şəkildə, filial, şöbə və s. təsisat kimi deyil, jurnalist fəaliyyət göstərə bilərlər".
