Azərbaycanda səfərdə olan türkiyəli jurnalistlər qardaş ölkənin Bakıdakı səfirliyini ziyarət ediblər. Səfər çərçivəsində baş tutan görüşdə Azərbaycan-Türkiyə münasibətlərində medianın rolu, tarixi bağlar və iki ölkə arasındakı strateji əməkdaşlıq müzakirə olunub.

 

Modern.az xəbər verir ki, tədbirdə çıxış edən Türkiyənin Azərbaycandakı fövqəladə və səlahiyyətli səfiri Birol Akgün bu cür görüşlərin əhəmiyyətini vurğulayıb. O, media nümayəndələrinin yalnız informasiya daşıyıcısı olmadığını, eyni zamanda cəmiyyətlər arasında körpü rolunu oynadığını bildirib.

 

Birol Akgün qeyd edib ki, Azərbaycan və Türkiyə münasibətləri sadəcə diplomatik və iqtisadi deyil, həm də dərin mədəni və tarixi köklərə əsaslanır. 

 

“Bu yaxınlıq 1918-ci ildə Qafqaz İslam Ordusunun komandanı Nuru Paşanın rəhbərliyi ilə türk əsgərlərinin Bakını azad etməsi ilə daha da möhkəmlənib”.

 

“Biz bir millət, iki dövlətik. Bu anlayış tariximizdə, coğrafiyamızda, dilimizdə və mədəniyyətimizdə əksini tapıb. Dünən Laçın Beynəlxalq Hava Limanının açılışında Prezident İlham Əliyev və Prezident Rəcəb Tayyib Ərdoğanın birlikdə iştirakı da bu birliyin canlı sübutudur”, – deyə Birol Akgün vurğulayıb.

 

O əlavə edib ki, regional və qlobal proseslərin dinamik şəkildə dəyişdiyi dövrdə Azərbaycan və Türkiyə kimi dost və müttəfiq ölkələrin birgə mövqeyi daha böyük əhəmiyyət daşıyır. Bu baxımdan medianın rolu həlledicidir.

 

 

Görüşdə çıxış edən digər jurnalistlər də media əməkdaşlığının gücləndirilməsinin vacibliyini önə çəkiblər.

 

Sonda türkiyəli jurnalistlər Azərbaycan-Türkiyə əlaqələrinin inkişafında səfirliyin rolunu yüksək qiymətləndirib, bu cür görüşlərin davamlı şəkildə keçirilməsinin zəruriliyini bildiriblər.