Türkiyənin tanınmış jurnalisti, NTV-də yaymlanan “Əsrarəngiz Türkiyə” layihəsinin rəhbəri Esra Gezgincinin Azərbaycana həsr etdiyi “Əsrarəngiz Azərbaycan” kitabı bir müddət əvvəl işıq üzü görüb. 
Kitab Azərbaycan mədəniyyəti, tarixi, coğrafiyası və Qarabağ müharibəsinə həsr olunub. 
Ön söz Türkiyə Cümhuriyyətinin Prezidenti Rəcəb Tayyib Ərdoğana məxsusdur.

Kitabın müəllifi Modern.az-ın redaksiyasında qonaq olub. Esra Gezginci bizimlə söhbətdə kitabın ərsəyə gəlməsi və özünün gələcək fəaliyyəti ilə bağlı fikirlərini bölüşüb.
 

- Esra xanım, Azərbaycana ilk gəlişiniz nə vaxt olub?
 

- Azərbaycana uzun zaman öncə şəhərləri kəşf etmək üçün gəlmişdim. Bura gəlməzdən öncə də Azərbaycan haqqında araşdırmalar aparırdım, elə o vaxtdan məndə qardaş ölkəyə qarşı xüsusi sevgi vardı. 

Azərbaycanı gəlib gördükdən sonra isə bura daha çox bağlandım. Bu səbəbdən bir müddət sonra Azərbaycan mədəniyyətini, tarixini, təbiətini özündə ehtiva edən “Əsrarəngiz Azərbaycan” adlı proqram hazırladıq. Proqram çərçivəsində Azərbaycana aid 10 veriliş çəkdik. Verilişləri hazırlayan ərəfədə istər Bakı, istərsə də Bakıətrafı əraziləri, o cümlədən işğaldan azad olunan Qarabağı daha yaxından öyrənmək imkanımız oldu. Qarabağ azad olunan kimi çəkilişlərə başladığımız üçün çətin şərtlərlə qarşılaşırdıq. Əslində buna görə həm də çox xoşbəxtəm ki, o çətinliyi də, indiki gözəlliyin də şahidi oldum. Burada çox şey öyrəndim, öyrəndiklərimi də kitab halına saldım. Kitab Türkiyənin Rabitə Nazirliyi tərəfindən hazırlanıb.

Bu layihədə yer aldığım üçün çox şadam. Ən önəmli qisim isə kitabın ön sözünün cənab Prezident Rəcəb Tayyib Ərdoğan tərəfindən yazılması oldu. Bu səbəblə də daha böyük kitab meydana gəldi və Türkiyənin Azərbaycana hədiyyəsi olaraq hazırlandı. Kitabda Azərbaycanın bir çox bölgələrinə geniş yer verilib. Həmçinin bu kitab Azərbaycanın mədəniyyətini, sənətini, musiqisini, Türkiyə və Azərbaycan qardaşlığını, “İki dövlət, bir millət” şüarını, bir sözlə hər şeyi izah edir. Zəngin kitab əslində bir əsərdir. Azərbaycan haqqında məlumatlar bu kitab sayəsində dildən-dilə keçərək yüz illər boyu nəsildən-nəsilə ötürüləcək. Kitab üç dildə yazılıb. Bir müddət öncə rabitə nazirimiz Fəxrəddin Altun kitabı cənab Hikmət Hacıyevə hədiyyə etdi. Bu da mənim üçün çox qürurverici oldu.
 

- Azərbaycanı gəzdiyiniz, veriliş hazırladığınız zaman ölkəmizlə bağlı nələr sizi valeh etdi?

- Verilişlərimdə də hər zaman deyirəm: Odun və küləyin ölkəsi, qəhramanlar yurdu can Azərbaycan! Bu söz əslində çox dərindir. Çünki bura eyni zamanda həm küləyin, həm alovun, həm də qəhrəmanların yaşadığı ölkədir. Azərbaycanı gəzdikcə, insanlar Qarabağ müharibəsi haqqında hekayələr danışanda, onları heyrətlə dinləyirdim. Mən Şuşaya gedib Cıdır düzünü gördükdə, ora əsgərlərin necə qalxdığını düşünməkdə belə, çətinlik çəkirdim. Kitabı yazanda da bunları düşünərək, gözümün qarşısına gətirərək hadisələri təsvir etməyə çalışırdım. Şəhidlərə Allahdan rəhmət diləyirəm. Onlar olmasaydı, biz bu qədər rahat yaşaya bilməzdik. Bu kitabı yazarkən də onlara borcumuzun olduğunu düşünürdüm. Bu borcu kitab yazaraq, ödəməyə çalışdığım üçüm çox xoşbəxtəm.

- Kitab yazarkən hansı resurslardan istifadə edirdiniz, getdiyiniz bölgənin insanları ilə söhbət etmək imkanınız olurdumu?
 

- Davamlı olaraq tarixçilərlə çalışırdıq. Hətta İçərişəhərdə tarixçi alim Nərgiz Axundova ilə bərabər bir neçə veriliş çəkdik, eyni zamanda digər verilişlərimizə də biri-birindən dəyərli qonaqlar çağırırdıq. Onlardan öyrəndiyim qiyməti ölçülməz məlumatlar da kitabda yer alıb. Həm azərbaycanlı, həm türkiyəli tarixçilərin, eyni zamanda Türkiyə Rabitə Nazirliyinin rəhbərliyi ilə məlumatların doğruluğunu dəqiqlədirərək, kitabda verdik.

- Türkiyədəki qardaşlarımız Azərbaycanı necə tanıyır və bu kitab onların ölkəmiz haqqında fikirlərinə necə təsir edəcək?

- Biri-birimizə qardaş ölkələr deyirik, amma əksəriyyət bu bağlılığın, yaxınlığın səbəbini bilmir. Düşünürəm ki, bu kitab iki ölkə arasındakı bağı çox yaxşı izah edir. Faktlarla dolu olan kitabımız eyni köklərə, adət-ənənələrə sahib olduğumuzu həm Azərbaycan, həm də türk oxuculara çatdıracaq.
 

- Azərbaycana bağlı olduğunuz görünür, gələcəkdə ölkəmiz barədə fikirləriniz nələrdir?
 

- Bura sevgimlə bağlıyam. Azərbaycanı çox sevirəm, danışanda Azərbaycan türkcəsində sözlər istifadə etməkdən zövq alıram. Gələcəkdə ömürlük bura köçmək barədə belə, düşünmüşəm. 

- Siz həm də sənədli filimlər hazırlamaq üzrə mütəxəssissiniz. Azərbaycanda bu sahəni necə qiymətləndirdiniz?
 

- Burada daha çox sənədli filimlər çəkilməlidir. Əsasən də Qarabağ bölgəsindən. Məsələn, mən burada çəkilişlər apararkən əksər türk izləyicilərimiz “biz bunları bilmirdik” deyirdilər. Ərsəyə gətirdiyimiz proqramlar, kitablar istər Türkiyəyə, istərsə də digər türk dövlətlərinə və eləcə dünyanın müxtəlif ölkələrinin Azərbaycanı – onun mədəniyyətini, tarixini, təbiətini, qəhrəmanlıq salnaməsini çatdıracaq. Azərbaycanın daha çox tanınması isə ölkənin birliyi, inkişafı baxımdan çox önəmlidir.