11-13 aprel tarixlərində Antalya Diplomatik Forumu keçirilib. Forumda Azərbaycan Prezidenti İlham Əliyev və birinci xanım Mehriban Əliyeva da iştirak edib.
Həmçinin, Prezidentin köməkçisi – Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev, Prezidentin xüsusi tapşırıqlar üzrə nümayəndəsi Elçin Əmirbəyov, xarici işlər naziri Ceyhun Bayramov, Prezidentin iqlim məsələləri üzrə nümayəndəsi Muxtar Babayev, Dövlət Statistika Komitəsinin sədri Tahir Budaqov, xarici işlər nazirinin müavini, COP29-un baş danışıqçısı Yalçın Rəfiyev, müdafiə naziri Zakir Həsənov, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov, Milli Məclisin Səhiyyə komitəsinin sədri Əhliman Əmraslanov, deputatlar Əziz Ələkbərli, Nigar Arpadarai, Ramil Həsən də Forumda iştirak ediblər.
Forumda iştirak edən deputat Əziz Ələkbərli Modern.az-a açıqlamasında Forumun əsas məqsədinin dünyada baş verən böhran və münaqişələrin həllində diplomatiyanın imkanlarını bir daha nəzərdən keçirmək, müzakirə etmək olduğunun və Forumun bu işin öhdəsindən layiqincə gəldiyini bildirib.
Ə.Ələkbərli söyləyib ki, “Qərbi Azərbaycana qayıdış insan hüquqları məsələsi kimi” mövzusunda çıxışı iştirakçıların diqqətini bütövlükdə bu məsələyə yönəldib:
"Forumda Azərbaycan Milli Məclisi çox hörmətli Əhliman Əmiraslanov, Səməd Seyidov, Nigar Arpadarai və mən daxil olmaqla dörd nəfər deputatla təmsil olunurdu. Mənim Forumun “Parlament diplomatiyası və Qlobal İdarəetmə” adlı panelində “Qərbi Azərbaycana qayıdış insan hüquqları məsələsi kimi” mövzusunda çıxış etməyim, iştirakçıların diqqətini bütövlükdə bu məsələyə yönəltdi. Bu da, istər panelin moderatoru, Türkiyə siyasətinin ünlü adamı Fuad Oktayın, istərsə də başqa çıxışçıların öz çıxışlarında dönə-dönə Qərbi Azərbaycan məsələsinə qayıtmasına səbəb oldu. Bu, bütövlükdə Azərbaycan diplomatiyasının növbəti uğuru idi.
Qərbi Azərbaycan İcması olaraq, biz bu siyasətimizi bundan sonra da sistemli şəkildə davam etdirəcəyik. Erməni yalanları, erməni saxtakarlıqları sona qədər ifşa olunmalı, ermənilərin son 200 ildə bölgədə yeritdikləri faşist siyasətin bütün mahiyyəti açılıb ortaya qoyulmalı, dünya ictimaiyyətinə çatdırılmalıdır. Ermənistan anlamalıdır ki, Qərbi Azərbaycan insanlarının tarixi-mənəvi haqqı özlərinə qaytarılmalı, onların öz ata-baba yurdlarına qayıdış hüququ tanınmalı və təmin olunmalıdır. Əks halda Ermənistan bunun bədəlini çox ağır ödəyəcək".
