Kino dünyasına damğa vuran məşhur "Kurtlar Vadisi Pusu" serialı təkcə Türkiyədə deyil, Azərbaycanda da böyük izləyici kütləsinə sahib olmuşdu. Serialın təqdim etdiyi siyasi intriqalar, mafiya münasibətləri, dərin dövlət anlayışı tamaşaçılar üçün həm maraqlı, həm də düşündürücü idi.
“Kurtlar Vadisi Pusu”nın uğurunun əsas səbəblərindən biri də real həyatda baş verən siyasi və sosial hadisələrlə paralellər qurması idi.
"Kurtlar Vadisi Pusu" yaddaşımızda sadəcə bir televiziya serialı kimi yox, həm də müəyyən bir dövrün ruhunu əks etdirən fenomen kimi qaldı. Onun qəhrəmanları, mesajları və atmosferi illər keçsə də, tamaşaçının xatirəsindən silinməyib.
Modern.az-ın “Məşhur filmin unudulmaz qəhrəmanı” adlı rubrikasında maraqlı filmlərdən yadda qalmış qəhrəmanların kim olduğu barədə qısa məlumat verir, onların keçmiş və indiki görüntüsünü şəkillərlə təqdim edirik.
Bu yazımızda qısa olaraq "Kurtlar Vadisi Pusu"da baş qəhrəman Polat Alemdarın qızı Elif Alemdar obrazını canlandırmış aktrisadan bəhs edirik.
Polat Alemdarın qızı kimi yadda qalan və 5 mövsüm “Kurtlar Vadisi Pusu” serialında rol alan aktrisa Doğa Sakarya indi kinodan uzaq, idmanla iç-içə bir həyat yaşayır.
Doğa Sakarya kiçik yaşlarında başladığı aktrisalıq karyerasında Elif obrazı ilə sevildi, yadda qaldı.
Bu yaxınlarda onun 20 yaşı tamam olub.
Doğa Sakarya 28 mart 2005-ci ildə İstanbulda dünyaya gəlib. Təhsil həyatına İstanbulda başlayıb. Orta təhsilini davam etdirən Doğa Sakarya 2011-ci ildə "Öyle bir geçer zaman ki" serialında rol alaraq aktrisalıq karyerasına başlayıb. Daha sonra 2013-cü ildə "Müqəddəs gün" serialında rol alıb.
Amma ən böyük uğuru 5 sezon dalbadal rol aldığı “Kurtlar Vadisi Pusu” serialında “Elif Alemdar” rolu olub. O, 2011-2016-cı illər arasında bu serialda rol alıb.
Doğa Sakarya “Kurtlar Vadisi Pusu”dakı rolu ilə tamaşaçılara öz təbiiliyi və emosional oyun qabiliyyəti ilə tanıdıldı. Onun aktyorluq tərzi duyğuları tamaşaçıya ötürmək bacarığı ilə seçilirdi. Azyaşlı olmasına baxmayaraq, Elif obrazında nümayiş etdirdiyi səhnə improvizasiyası bir çox böyük yaşlı aktyorların belə çata bilmədiyi emosional təsir gücünü əks etdirirdi.
Serialın tənqidçiləri Doğa Sakaryanın perfomansını yaşına görə yüksək qiymətləndirir və gələcəkdə böyük layihələrdə baş rollarda yer ala biləcək istedadlı aktrisa kimi xarakterizə edirdilər. Tamaşaçılar isə onun səmimi baxışlarını, göz yaşları ilə dolu səhnələrdəki təbii oyununu uzun illər yadda saxladılar.
“Kurtlar Vadisi Pusu”dan sonra aktrisalıq karyerasında hələ ki növbəti partlayış etməyən Doğa Sakarya müxtəlif layihələrdə yer alıb.
O, hazırda oxatma idman növündəki çıxışı ilə də diqqət çəkir.
Doğa Sakarya sosial şəbəkələrdəki paylaşımları vasitəsilə izləyiciləri ilə ünsiyyət qurur.
Onun bugünkü görünüşü və dəyişimi də arabir medianın gündəmində olur. Lakin bir çoxları üçün o, hələ də "Polat Alemdarın qızı Elif" olaraq yadda qalır.
A.Qorxmaz
