“Şamaxinka”dan, Bakı Beynəlxalq Avtovağzalının yaxınlığından Sumqayıt və Bakı istiqamətində yollar buz bağlayıb. Sözügedən ərazidən Sumqayıta doğru Qafqaz Universitetinə qədər olan yollarda görünməmiş tıxac yaranıb.
Noyabrın 24-də gündüz saatlarında yağan qar Azərbaycanın böyük şəhərlərində, o cümlədən Bakı və Sumqayıtda ciddi problemlər yaradıb. Nəticədə axşam saatlarında Bakı-Sumqayıt yolunda nəqliyyatın hərəkəti iflic olub, yol tamam bağlanıb.
Modern.az saytının hadisə yerində olan əməkdaşı xəbər verir ki, Sumqayıt sakinləri çıxış yolu kimi Bakıdan Sumqayıta piyada getməyi görüblər. Odur ki, insanlar tıxaclarda qalmış avtobuslardan düşərək Sumqayıt istiqamətində hərəkət edirlər. Bakı-Sumqayıt yolu piyadalarla doludur.
Modern.az
