Prezident İlham Əliyevin sərəncamı ilə Mərkəzi Bankda yüksək vəzifələrə təyinatlar olub. Belə ki, sərəncama əsasən, Əliyar Qəhrəman oğlu Məmmədyarov Azərbaycan Respublikası Mərkəzi Bankı sədrinin birinci müavini, Vüsal Cahangir oğlu Xəlilov, Əli İsmayıl oğlu Əhmədov, Toğrul Nəcəfəli oğlu Əliyev və Gülər Azər qızı Paşayeva Azərbaycan Respublikası Mərkəzi Bankı sədrinin müavinləri təyin ediliblər.
Modern.az yeni vəzifə verilən şəxslərin kim olduğunu araşdırıb.
Əliyar Məmmədyarov 1977-ci ildə Bakı şəhərində anadan olub. Azərbaycan Dövlət İqtisad İnstitutu və Böyük Britaniyanın Nottingem Universitetininin məzunudur.
2001-ci ildən Mərkəzi Bankda çalışır. O, 2022-ci ilin may ayının 31-dən Milli Məclisin qərarı ilə Mərkəzi Bankı İdarə Heyətinin üzvü vəzifəsinə təyin edilib. Prezidentin 7 iyun 2022-ci il tarixli Sərəncamı ilə Mərkəzi Bank sədrinin müavini vəzifəsinə gətirilib.
Toğrul Nəcəfli oğlu Əliyev
O, 1983-cü ildə Bakı şəhərində anadan olub. 2004-cü ildə Bakı Dövlət Universitetinin “Hüquqşünaslıq” ixtisası üzrə bakalavr dərəcəsini, 2023-cü ildə Böyük Britaniyanın Şeffild Universitetinin “Biznesin idarə edilməsi” ixtisası üzrə magistr dərəcəsini bitirib. Toğrul Əliyev 2008-ci ildən Mərkəzi Bankda işləyir. 2020-ci ilin yanvar ayından Mərkəzi Bankın baş direktoru vəzifəsinə təyin edilib. Hal-hazırda həmin vəzifədə çalışır.
Gülər Azər qızı Paşayeva
1989-cu ildə Bakı şəhərində anadan olub. 2010-cu ildə Bakı Dövlət Universitetinin “Beynəlxalq hüquq” ixtisası üzrə bakalavr dərəcəsini, 2012-ci ildə həmin universitetin “Kommersiya hüququ” ixtisası üzrə magistr dərəcəsini fərqlənmə diplomları ilə bitirib. 2021-ci ildə isə Böyük Britaniyanın İdarəetmə üzrə İxtisaslaşmış İnstitutunun (The Chartered Governance Institute) İdarəetmə peşəkarları üçün ixtisaslaşma proqramını bitirib. 2022-ci ilin iyun ayında Azərbaycan Respublikası Mərkəzi Bankında sədrin müşaviri vəzifəsinə təyin edilib. 2022-ci ilin iyul ayından Mərkəzi Bankın baş direktoru vəzifəsində çalışır.
Əli İsmayıl oğlu Əhmədov
1982-ci ildə Naxçıvan şəhərində anadan olub. 2004-cü ildə Türkiyə Cumhuriyyətinin Qazi Universitetini “İqtisadiyyat” ixtisası üzrə bakalavr dərəcəsi ilə, 2006-cı ildə Odlar Yurdu və ABŞ-ın Corciya dövlət universitetinin birgə proqramı olan “Biznesin idarə olunması” ixtisası üzrə MBA proqramını magistr dərəcəsi ilə, 2014-cü ildə isə ABŞ Cons Hopkins Universitetini “Dövlət siyasəti” üzrə beynəlxalq magistr dərəcəsi ilə bitirib. 2020-ci ilin yanvar ayından Mərkəzi Bankın baş direktoru vəzifəsinə təyin edilmişdir. Hal-hazırda həmin vəzifədə çalışır.
Vüsal Cahangir oğlu Xəlilov
1987-cı ildə Şəki şəhərində anadan olub. 2008-ci ildə Bakı Dövlət Universitetini “İnformatika” ixtisası üzrə bakalavr, 2011-ci ildə isə həmin universiteti eyni ixtisas üzrə magistr dərəcələri ilə bitirib. 2015-ci ildə ADA Universiteti və “Maastricth School of Management” birgə EMBA proqramına daxil olub. 2017-ci ildə həmin universitetləri Beynəlxalq Biznesin İdarəedilməsi ixtisası üzrə magistr dərəcəsilə bitirib. 2024-cü ilin may ayından Mərkəzi Bankın baş direktoru vəzifəsinə təyin edilib. Hal-hazırda həmin vəzifədə çalışır.
