Bayraq matəm günlərində, önəmli dövlət adamlarının ölümü və ildönümləri zamanı onlara hörmət əlaməti olaraq, təhlükəli vəziyyətlərdə, beynəlxalq səviyyəli terror, fəlakətlər zamanı və bəzi hallarda salamlama simvolunun göstəricisi kimi normal yüksəklikdən aşağı endirilir.
Bakı-Qroznı reysini yerinə yetirən “Embraer 190” tipli sərnişin təyyarəsinin qəzaya uğraması nəticəsində çoxsaylı insanın həlak olması ilə əlaqədar dekabrın 26-da Azərbaycanda matəm elan edilib. Bu səbəbdən bayraq yarıya qədər endirilib.
Modern.az xəbər verir ki, sonuncu dəfə Azərbaycanda matəm 6 dekabr 2015-ci il tarixində olub.
O zaman ölkə səviyyəsində matəm elan edilməsinə səbəb 2015-ci ilin 4 dekabr tarixində "Günəşli" neft yatağının 10 saylı dərin dəniz özülündə güclü qasırğanın doğurduğu qəza nəticəsində çoxsaylı insan tələfatı olub. Həmin hadisə nəticəsində 63 nəfər zərər çəkib ki, onlardan da 16-sı dünyasını dəyişib, 17-si itkin düşüb. Bu hadisə ilə əlaqədar olaraq Azərbaycan Respublikası Prezident İlham Əliyevin qərarı ilə Azərbaycanda 6 dekabr tarixi matəm günü elan olunub.
