Azərbaycan bu gün beynəlxalq aləmdə öz sözünü deyən ölkələrdən biridir. Xüsusilə də, 44 günlük Vətən müharibəsində və birgünlük antiterror tədbirlərinin keçirilib, suverenliyin bərpa edilməsindən sonra artıq geridönüşü olmayan yola daxil olduq. Lakin İkinici Qarabağ müharibəsində ordusu məhv edilən Ermənistan yenə də silahlanır. Bu silahların müdafiə üçün tədarük edildiyi deyilsə də, onların hücum silahları olması başqa niyyətlərin də olduğunu göstərir. Xüsusilə də, Fransa kimi ölkələr yaranmış reallıqları həzm edə bilmir və Ermənistandan istifadə edib öz əməllərini həyata keçirməyə çalışırlar. Prezident İlham Əliyev Dünya Azərbaycanlılarının Həmrəyliyi və Yeni il münasibətilə xalqa müraciətində Ermənistanı təhrik edən qüvvələrdən danışıb və heç kəsin Azərbaycanla rəqabət apara bilməyəcəyini bildirib.
"Əgər bu il bizim üçün ən narahatedici məqamı qeyd etsək, təbii ki, bu, Ermənistanın silahlanmasıdır. Bunun heç bir məntiqi izahatı yoxdur. Ermənistan öz işğalçılıq siyasətində tamamilə iflasla üz-üzə qalmışdır. 2020-ci və ondan sonra 2023-cü illərdəki hərbi məğlubiyyətləri onlara düz yol göstərməli idi. Biz də buna çalışırdıq və bu gün də öz səylərimizi davam etdiririk. Mən dəfələrlə həm rəsmi bəyanatlarımda, həm Ermənistan tərəfi ilə apardığımız danışıqlar əsnasında onlara xəbərdarlıq etmişəm ki, bu təhlükəli yoldan çəkinsinlər. Onları təhrik edən və bu gün yenə də Azərbaycan üzərinə hücum etməyə vadar edən xarici dairələr, xarici ölkələr onların arxasında durmayacaq, sadəcə olaraq, dura bilməyəcək. Bizimlə bu bölgədə hərbi müstəvidə heç bir qüvvə rəqabət apara bilməz. Ona görə bir daha deyirəm, hələ ki, gec deyil, bu təhlükəli yoldan geri qayıtsınlar. Cənubi Qafqaz sülh, əmin-amanlıq, əməkdaşlıq bölgəsi olmalıdır",-ölkə başçısı deyib.
Məsələ ilə bağlı Modern.az-a danışan Milli Məclisin Müdafiə, təhlükəsizilik və korrupsiya ilə mübarizə komitəsinin sədri Arzu Nağıyev bildirib ki, Azərbaycan müharibəni bitirib və yeni reallıqlar yaradıb:
"Ümumiyyətlə, 44 günlük Vətən müharibəsindən sonra, Azərbaycan Cənubi Qafqaz regionunda yeni reallıqlar yaradıb. Belə ki, artıq Azərbaycanın rəyini almadan bu regionda nəsə etmək qeyri-mümkündür. Bu bir yandan hərbi gücümüz, digər yandan da Prezident İlham Əliyevin apardığı uğurlu xarici siyasətin, diplomatyanın hesabınadır. 44 günlük müharibədən 3 il sonra Qarabağın dağlıq hissəsindəki erməni separatçılara qarşı birgünlük uğurlu antiterror əməliyyatları keçirildi. Nəticədə, suveneliyimizi bərpa etdik. Azərbaycan problemi və müharibəni bitirib. İndi Böyük Qayıdış layihəsi çərçivəsində Qarabağda böyük quruculuq və bərpa işlərinə fokuslanmışıq. Bizim gündəmimizdə daha hər hansı müharibə yoxdur. Prezident Cənubi Qafqazda yaratdığı yeni reallıqları beynəlxalq və siyasi müstəvidə təsdiqlədib".
Komitə sədri vurğulayıb ki, buna baxmayaraq, bir sıra beynəlxalq güclər, ölkələr hazırki durumdan heç də razı deyillər və bunu Azərbaycana qarşı əməllərində açıq büruzə verirlər:
"Belə ki, ordusu 44 günlük Vətən müharibəsində darmadağın edilən Ermənistanı gücləndirmək, bununla da yenidən münaqişəni alovlandırmaq istiqamətində cəhdlər edirlər. Prezident İlham Əliyevin xalqa müraciətində də bu məsələyə toxunub.
Prezident deyib: “Ona görə bir daha özümə borc bilib Ermənistan rəhbərliyinə növbəti xəbərdarlıq edirəm ki, bu təhlükəli yoldan çəkinsinlər. Bir də ki, bizimlə hərbi və istənilən sahədə rəqabət aparmaq onların iqtidarında deyil”.
Bütün dünya Azərbaycanın yaratdığı reallıqla barışmağa məcbur olub. Lakin məlumdur ki, Fransa kimi ölkələr hələ də nəsə edəcəklərinə, Ermənistanı gücləndirərək, münaqişəni alovlandıracaqlarına və regionda nüfuz sahibi ola biləcəklərinə ümid edirlər. Lakin bu elə xəyaldan başqa bir şey deyil. Ona görə ki, Prezident İlham Əliyevin düzgün müəyyənləşdirdiyi xarici diplomatiyamız, siyasətimiz çox güclüdür. Bu gün Azərbaycan tamamilə müstəqil xarici və daxili siyasət yürüdür. Digər yandan ordumuz çox güclüdür. Bizimlə heç bir sahədə Ermənistanın rəqabət aparması mümkün deyil".
