Dekabrın 29-da İranın Ali rəhbərinin Ərdəbil vilayəti üzrə nümayəndəsi, Ərdəbilin imam cüməsi Seyid Həsən Amelinin iştirak etdiyi və İranın Radio və Televiziya Təşkilatının “Xəbər Şəbəkəsi” kanalında yayımlanan tədbirdə Azərbaycana və dövlət başçısına qarşı təhqiramiz ifadələr səsləndirilib.
Təxribatçı davranışla bağlı İranın Azərbaycandakı səfirliyinin müvəqqəti işlər vəkili Seyid Cəfər Ağayi Məryan bu gün Xarici İşlər Nazirliyinə (XİN) çağırılıb və ona sərt etiraz bildirilib, son zamanlar İranda əhali arasında açıq-aşkar şəkildə anti-Azərbaycan əhval-ruhiyyəsinin ciddi şəkildə qızışdırılması ilə əlaqədar narazılıq diqqətə çatdırılıb.
İrandan Azərbaycana qarşı bu kimi təxribatlara son qoyulması tələb olunub.
Qeyd edək ki, təxribatçı açıqlamalar Türkiyə və onun liderinə də ünvanlanıb.
Modern.az-ın məlumatına görə, Güney Azərbaycan milli hərəkatının lideri Abbas Lisani sözügedən hadisə ilə bağlı İranın molla rejiminə sərt reaksiya verib.
O bildirib ki, İranın bu cür davranışı böyük çöküş və parçalanma istiqamətində atılan addımların səsidir.
Abbas Lisani qeyd edib ki, son illər Azərbaycan Prezidenti və Qarabağın fatehi İlham Əliyevin və Türkiyə Prezidenti Rəcəb Tayyib Ərdoğanın rəhbərliyi ilə böyük və tarixi uğurlar əldə edilib.
"Dünyanın və bölgənin zalım güclərinin Türkiyə planları iflasa uğradı və türk dünyasının güclənməsinə töhfə verdi.
Bu tarixi nailiyyətlər, əlbəttə ki, dostları sevindirir, düşmənləri isə üzür.
Lakin özünü dünya müsəlmanlarının müdafiəçisi və himayədarı kimi göstərməyə çalışan İran rejimi otuz ildir ki, ermənilərlə pərdə arxasında dayanıb, onlara dəstək verib və müsəlman Azərbaycan türklərinə qarşı əlindən gələni etməkdən çəkinməyib.
Bu qeyri-insani, dinsiz davranışlar Qarabağın azad edilməsindən sonra daha aydın görünməyə başladı və fars faşizmi türklərə qarşı düşmənçiliyini hər sahədə nümayiş etdirir.
Məsələn, İran Dövlət Televiziyasında yayımladıqları qondarma dini məclisdə bir ağacın iki budağı olan qardaş xalqlar (Azərbaycan və Türkiyə) arasında İslam və Türk dünyasının qara səhifəsi olan Çaldıran döyüşünü gündəmə gətirərək, ayrılıq və nifaq salmağı hədəfləyiblər. İnsanların məzhəb həssaslığını vurğulayıb, Yaxın Şərqdə və bölgədə həyata keçirdikləri yanlış və insanlıqdan kənar siyasətlərin iflasa uğramasını özlərinə sığışdıra bilmədikləri üçün bu cür alçaq və dəyərsiz davranışlara əl atdılar.
Bu qondarma məclisdə, daha doğrusu, nifaq çuxurunda türk millətinə və dövlətlərinə qarşı kin-küdurət ən alçaq sözlərlə ifadə edilib, müxtəlif təhqirlər yağdırılıb. Bir vaxt tərifçi deyilən şəxs şəriətdən, əxlaqdan, insanlıqdan uzaq sözlərlə iki müsəlman dövlət başçısına böhtan atıb, təhqir edib və bu iyrənc tamaşa mərkəzi televiziya kanallarında canlı yayımlanıb. Bu yayım fars şovinizminin türk millətinə qarşı sistemli nifrət və düşmənçiliyini açıq şəkildə nümayiş etdirirdi.
Əslində, bu cür davranış İran rejiminin nə qədər və aciz olduğunun sübutudur. Onun süquta doğru atdığı addımların səsidir. Bu həm də böyük məhvə işarədir.
Təbii ki, təhqirə, böhtana məruz qalan dövlət başçıları bu rəzil şouya dövlət ağlı, diplomatik qaydalar çərçivəsində necə yanaşmaq lazım olduğunu çox gözəl bilirlər. Ancaq bir Güney Azərbaycanlısı olaraq qeyd etməliyəm ki, müsəlman və türk millətləri, dövlətləri arasında ayrı-seçkilik, nifaq salmağa çalışan hər bir məqsəd, metod və davranışı vətənə xəyanət kimi görür, qətiyyətlə pisləyirəm.
Sonda qeyd etmək istərdim ki, bu oyunlar suyun səthində üzən köpükdən başqa bir şey deyil.
Türk dünyası, xüsusən də Güney Azərbaycan türkləri çoxdan öz doğru yolunu tapıb. Bu səbəbdən ixtilaf, azdırıcı və uydurma oyunlar bizi və gənclərimizi doğru yoldan döndərə bilməyəcək".
Bəyanatla bağlı Modern.az-a danışan Abbas Lisani bildirib ki, Azərbaycan və Türkiyə onun üçün çox dəyərli və toxunulmazdır: "Ölkələrimiz haqqında ağlına gələni danışmaq heç kimin həddi deyil".
Abbas Lisani Modern.az saytı vasitəsilə təyyarə qəzasında həlak olanların ailələrinə başsağlığı verib, yaralıların tezliklə sağalmasını arzuladığını bildirib, o, həmçinin bütün xalqımızı Yeni il və Dünya Azərbaycanlılarının Həmrəyliyi günü münasibəti ilə təbrik edib.
Nigar Ögeday
