Dekabrın 25-də Bakıdan Qroznıya uçan AZAL-a məxsus “Embraer” təyyarəsi Qazaxıstanın Aktau şəhəri yaxınlığında qəzaya uğrayıb. Təyyarənin qəzaya uğramasına səbəb onun Rusiya üzərində hücuma məruz qalması olub. Hadisə ilə bağlı araşdırmalar davam edir.

Hadisədən qısa müddət sonra Azərbaycan Prezidenti İlham Əliyev Qazaxıstan lideri Kasım-Jomart Tokayevə zəng edib. Dövlət başçıları Azərbaycan və Qazaxıstan vətəndaşlarının olduğu təyyarənin qəzaya uğraması nəticəsində insanların həlak olması ilə bağlı bir-birinə, həmçinin həlak olanların yaxınlarına başsağlıqlarını bildirib, yaralananlara tezliklə şəfa arzulayıblar.

İlham Əliyev təyyarə qəzası ilə bağlı AZTV-yə müsahibəsində də Qazaxıstanın fəaliyyətini yüksək qiymətləndirib. 

"Çünki biz bilirdik və məlumat əldə etmişdik ki, qəza baş verən kimi Qazaxıstan xilasediciləri dərhal hadisə yerinə yetişdilər və insanları o dağılmış füzelyajdan çıxartmağa başlamışdılar. Öz həyatlarını risk altına atmışdılar. Çünki onlar bilmirdilər ki, növbəti partlayış olacaq, yoxsa yox. Çünki təyyarənin bir hissəsi yanmışdı və bu hissədə yana bilərdi. Amma buna baxmayaraq, onlar da əsl qəhrəmanlıq göstərmişdilər. Eyni zamanda, həkim personalının fəaliyyəti də çox qiymətli idi. Çünki yaralı sərnişinlər dərhal tibb məntəqələrinə aparıldılar və buna görə də Prezident Tokayevə mən təşəkkürümü bildirdim. Qazaxıstanlı qardaşlarımızın, bacılarımızın həmrəylik nümayişi də mən bilirəm ki, Azərbaycan xalqının qəlbində çox böyük iz buraxmışdır. Adi vətəndaşlar bizim Aktaudakı konsulluğa gələrək gül qoydular, öz münasibətlərini bildirdilər, bizimlə həmrəy olduqlarını bildirdilər. Əsl dostluq, qardaşlıq belə olar".

Modern.az-a danışan Qazaxıstan parlamentinin deputatı Erlan Sairov bildirib ki, Azərbaycanla Qazaxıstanın prinsipial mövqeyi ədalətin ortaya çıxmasına konkret təsir göstərə bilər.

"Buna görə də mən düşünürəm ki, belə dövrlər: birincisi, bizim qardaşlıq əlaqələrimizin daha da inkişaf edəcəyinə işarədir. İkincisi, bir-birimizi daha dərin səviyyədə anladığımızı göstərir. Üçüncüsü, əgər birlikdə olsaq və birgə çalışsaq, beynəlxalq iqtisadi sahədə hər iki ölkənin ümumi potensialını artırmağı bacaracağıq. Buna görə də mənim fikrimcə, biz sosial, iqtisadi və siyasi inteqrasiyanı davam etdirməliyik".

O qeyd edib ki, Azərbaycan səfirliyinə gedərək orada başsağlığı verib:

"Həmin vaxt insanların dəstəyinin dayanmaması çox təsirli idi. Bu, ilk növbədə, bizim qazax xalqının həmrəylik səviyyəsini göstərir".