Böyük Qayıdış Proqramı çərçivəsində Qarabağ və Şərqi Zəngəzur sakinlərinin azad olunmuş ərazilərə  davamlı köçü həyata keçirilməkdədir. Ata-baba yurduna qayıdan insanlar orada evlə, həyətyanı sahə ilə təmin olunurlar. 

Artıq Zəngilan, Laçın, Füzuli, Cəbrayıl, Şuşa, Xocalı, Xankəndiyə 30 min nəfərdən çox adam köçürülüb.

"Böyük Qayıdış" prosesi nəticəsində doğma yurd-yuvalarına dönən keçmiş məcburi köçkünləri narahat edən bir məsələ var: qəbiristanlıqların bərpası, Qarabağ və Şərqi Zəngəzur bölgəsində vəfat edən yerli sakinlərin orada dəfn olunması...

Qeyd edək ki, azad olunan və əhalinin köçdüyü bəzi bölgələrdə vəfat edən insanlar hələ də həmin ərazidə dəfn olunmurlar. Qarabağ və Şərqi Zəngəzurda yaşayan sakinlər vəfat edən yaxınlarını hələ də orada dəfn edə bilmirlər. Bununla bağlı bəzi çətinliklər qalır. Qeyd edək ki, Böyük Qayıdışa dair I Dövlət Proqramında qəbiristanlıqların yaradılması da nəzərdə tutulub.

Modern.az bu barədə dəfələrlə məsələ qaldırıb. Bəzi bölgələrdə problem həll olunsa da, bəzilərində hələ aradan qaldırılmayıb.

Bir müddət əvvəl xəbər vermişdik ki, Şuşa şəhərindəki qəbiristanlıqda dünyasını dəyişən bir neçə keçmiş məcburi köçkünü dəfn etmək mümkün olub.

Laçından olan ziyalı Qəzənfər Hüseynov saytımıza verdiyi açıqlamada bildirilib ki, qəbiristanlıq məsələsi Laçında da problem idi.

"Laçın qəbiristanlığı ermənilər tərəfindən dağıdılmışdı. Burada abadlıq işləri başlanandan sonra müəyyən işlər görüldü. Təxminən 300 məzar daşı gətirilmişdi. Dağıdılan qəbirlərin 260-dan çoxu bərpa edildi. İnsanlar bu problemlə bağlı mənə müraciət edirdi, mən də nümayəndəliyə müraciət etdim. Bir Qarabağ qazisi zabitimiz Bakıda yaşayırdı, vəsiyyət etmişdi ki, öləndə Laçında dəfn olunsun. Sonra oğulları müraciət etdi, mən də məsələni Laçın rayonunda Prezidentin xüsusi nümayəndəliyinin əməkdaşı Hüseyn Quliyevə danışdım, o da sağ olsun, bizə kömək etdi. Biz həmin qazimizi gətirib burada ana-atasının yanında dəfn etdik. Bu gün kimsə  Laçında dəfn olunmağını vəsiyyət edibsə, bu məsələdə köməklik göstərilir. Əgər həmin şəxsin valideynlərinin məzarı yanında yer yoxdursa, Qarıkaha kəndində salınmış yeni qəbiristanlığa aparılır. Orada şəhidlər üçün də ayrıca qəbiristanlıq yeri ayrılıb”.

Müsahibimiz qeyd edib ki, Laçında qəbiristanlıq problemi öz həllini tapıb:

“Əvvəllər belə problem vardı, artıq bunu həll etdik. Ümumiyyətlə, insan harada ölsə, orada da dəfn olunmalıdır. Məsələn, burada bir nəfər vəfat etdi, biz də dəfnində iştirak etdik. Oğullarına dedim ki, o, bura ölməyə gəlib, niyə aparırsınız?!  Dedilər ki, yoldaşı Bakıdadır, ora aparırıq. Bu şeyləri sakinlərin öz qohumları istəyir”.