Dünyada bir çox ölkədə vəfat edən insanların meyiti yandırılır, yəni kremasiya edilir. Ölülərin nəşini yandırmağın səbəbləri hər bir əraziyə, dünya görüşünə və dini inanca görə dəyişir. Bura dini və mədəni amillər, ekoloji, iqtisadi, şəhərsalma və urbanizasiya kimi səbəblər daxildir.
Modern.az xəbər verir ki, son günlər Azərbaycanda da vəfat edən şəxslərin yandırılması məsələsi aktuallışıb.
Bəs hansı ölkələrədə, hansı səbəblərə görə meyitlərin yandırılmasına üstünlük verilir?
Asiya ölkələrində meyitlərin yandırlması ənənəsi Hindistan, Nepal, Çin, Yaponiya və Tayland, Şri-Lanka, Myanma ərazilərində yayğındır. Hinduizmdə ruhun bədəndən ayrılaraq yenidən doğulmasına inanıldığı üçün kremasiya müqəddəs sayılır və ölən insanların külünün Qanq çayına səpilməsi Hindistanda geniş yayılıb. Nepalda da aparıcı din olan Hinduizmin təsiri ilə kremasiya geniş yayılıb. Katmandu vadisindəki Paşupatinath məbədində açıq havada kremasiya edilir və meyitin külü vəfat edən şəxsin yaxınları tərəfindən saxlanılır.
Çində isə ölənlərin yandırılması bir növ dövlət proqramı kimi həyata keçirilir. Belə ki, əhalinin sıxlığı və torpaq çatışmazlığı səbəbindən hökumət insanları vəfat edən qohumlarını yandırmağa təşviq edir. Yaponiyada isə Buddizm və Şintoizmin təsiri ilə cənazələrin kremasiya edilməsi adətdir. Torpağın məhdud olması da bu addımın atılması üçün mühüm faktordur.
Təkcə Asiya ölkələrində deyil, eyni zamanda bir çox Avropa ölkələrində də meyitlərin yandırılması artıq ənənə halına gəlib. Belə ki, Skandinaviya ölkələrində (İsveç, Norveç, Danimarka, Finlandiya, İslandiya) dini təsirlər zəifdir və insanlar daha yaxşı şəhər, ekoloji baxımdan təmiz mühitin lehinə olduqları üçün kremasiyaya üstünlük verirlər. Almaniya, Böyük Britaniya, Fransa, İtaliya, İspaniya kimi sosial, iqtisadi baxımdan inkişaf etmiş ölkələrdə torpaq qıtlığı, yüksək qəbiristanlıq xərcləri və dünyəvi baxışların güclənməsi səbəbindən ölülərin yandırılması populyarlıq qazanıb.
Şimali Amerika – ABŞ və Kanadada isə şəhərlərdə qəbiristanlıqların bahalı olması və əhalinin dünyəvi düşüncəyə meyllənməsi səbəbindən kremasiya sürətlə yayılır.
