2025-ci ilin ilk həftəsindən etibarən Azərbaycan hökumətində bir sıra dəyişikliklər baş verib. Belə ki, 19 il maliyyə naziri vəzifəsində çalışan Samir Şərifov Baş nazirin müavini təyin edilib. Prezident İlham Əliyev bu barədə müvafiq sərəncamdan təxminən bir ay sonra əmək və əhalinin sosial müdafiəsi naziri Sahil Babayevi vəzifəsindən azad edərək maliyyə naziri təyin edib. Bu gün imzalanan sərəncamla isə Sahil Babayevi onun müavini Anar Əliyev əvəzləyib.

Həmçinin, ekologiya və təbii sərvətlər naziri Muxtar Babayev də hökumətdəki vəzifəsini itirib. O, müvafiq sərəncamla Prezidentin iqlim məsələləri üzrə nümayəndəsi təyin olunub.

Qeyd edək ki, Azərbaycanda ötən il keçirilən prezident seçkilərindən sonra - fevralın 16-da Azərbaycan hökumətinin yeni tərkibi təsdiqlənmişdi. Həmin sərəncamdan bir il vaxt keçməmiş hökumətdəki kadr dəyişiklikləri maraq doğurub.

Mətbutda kadr dəyişiklikləri ilə yanaşı struktur dəyişikliklərinin də gözlənildiyi barədə xəbərlər yayılıb. Bəzi nazirliklərin, komitə və xidmətlərin birləşdiriləcəyi iddia edilir.

Məsələ ilə bağlı Modern.az-a danışan Milli Məclisin Əmək və sosial siyasət komitəsinin sədri Musa Quliyev bildirib ki, hər üç şəxs - Samir Şərifov, Sahil Babayev, Anar Əliyev uzun müddət çalışıb və layiqli kadrlardır:

“Bu təyinatlar cənab Prezidentin səlahiyyətindədir. Biz bunu nə şərh edə, nə müzakirə edə bilərik ki, nəyə görə cənab Prezident bu qərarları qəbul edib. Hər üç naziri - Samir Şərifovu da, Sahil Babayevi də, bu gün yeni nazir təyin edilən Anar Əliyevi də çox yaxşı tanıyıram. Uzun müddət də bir yerdə işləmişik. Onların hər üçü dövlətçi adamlardır, öz işlərinin peşəkarıdırlar. Öhdələrinə düşən vəzifələri çox ləyaqətlə  yerinə yetiriblər. Biz həm Sahil Babayevlə, həm də Anar Əliyevlə 6 il işgüzar və faydalı şəkildə əməkdaşlıq edirik. O əməkdaşlığın nəticələri də müsbət oldu”.

Komitə sədri bundan sonra da hər iki nazirin, həmçinin Samir Şərifovun Baş nazirin müavini kimi öz vəzifələrini layiqi ilə yerinə yetirəcəyinə inandığını deyib: “Bunların hər üçü layiqli kadrlardır. Azərbaycan dövlətinə və hökumətinə uğurla xidmət etmiş və yaxşı nətiəcələri olan şəxslərdir, dövlət adamlarıdır”.

Milli Məclisin deputatı Razi Nurullayev ard-arda baş verən kadr dəyişikliyini normal hesab edir:

“Hökumətdə hər zaman yeni insanlar gəlir. Bəzi insanlar vəzifəsini dəyişir, yaxud gedir. Bu,təbii prosesdir. Prezidentin səlahiyyətinə daxil olan məsələdir. Yəqin rəhbərin özünün düşüncələri, fikirləri var. Buna görə də, belə dəyişikliklər olur. Nəyin dəyişəcəyini görmək üçün gərək bir neçə ay izləyək. Bu saat  nəyin dəyişib-dəyişməyəcəyini açığı deyə bilmərəm. Hər halda daha yaxşısına ümid edirik. Ümid edirəm ki, ən azından daha yaxşı olacaq”.

R.Nurrulayev yeni təyin olunan nazir Anar Əliyevi tanıdığını, yaxşı münasibətlərinin olduğunu, onu yaxşı insan kimi tanıdığını vurğulayıb:

“Ümid edirəm ki, insanların yaddaşında yaxşı, gözəl nazir kimi qalacaq. Mən Sahil  Babayevə də yeni işində maliyyə naziri vəzifəsində uğurlar arzulayıram. O, maliyyə məsələlərinin tənzimlənməsində daha sərt nazir kimi tanınıb. Hər bir məsələdə qənaət olunması, maliyyə vəsaitlərinin daha yaxşı xərclənməsimi deyim, müəyyən uğurları var.  Bəlkə də, elə buna görə maliyyə naziri təyin olunub. Samir Şərifov təbii ki, uzun müddət maliyyə naziri işləyib. Xeyli təcrübəli şəxsdir. Onun da Nazirlə Kabinetində bir çox məsələlərdə müəyyən bir müsbət dəyişikliklər yaradacağına inanıram. Hər zaman  müsbətə köklənməliyik. Mən də yeni təyinatlar haqda müsbət düşünürəm. Ümid edək  ki, onların bu təyinatından xalqımız, millətimiz, dövlətimiz udacaq”.