Prezident İlham Əliyevin sərəncamı ilə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti Dövlət Agentliyinə çevrilib.

Belə ki, qurum bundan sonra Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi adlandırılacaq. 

Modern.az-ın məlumatına görə, yeni Agentliyin yaradılması ilə əvvəlki qurumun Antiinhisar və İstehlak Bazarına Nəzarət Dövlət Xidmətinin rəisi Məmməd Abbasbəyli vəzifəsini itirib.

Dövlət başçısının digər sərəncamı ilə Elnur Bağırov yeni Agentliyin sədri təyin olunub. O, indiyədək Dövlət Xidmətində rəis müavini vəzifəsində çalışırdı. M.Abbasbəyli isə yeni qurumda vəzifə tutmayıb.

M.Abbasbəyli 1975-ci ildə Gəncə şəhərində anadan olub. 2019-2020-ci illərdə İqtisadiyyat nazirinin müşaviri vəzifəsində çalışıb. O, 2020-ci ilsə Antiinhisar və İstehlak Bazarına Nəzarət Dövlət Xidmətinin rəis müavini, 2021-ci ildə rəisi təyin edilib.

O, Mədəniyyət Nazirliyi Aparatının rəhbəri, Əmək və Əhalinin Sosial Müdafiəsi Nazirliyi (ƏƏSMN) tabeliyində Dövlət Məşğulluq Agentliyinin İdarə Heyətinin keçmiş sədri Mustafa Abbasbəylinin qardaşıdır.