44 günlük Vətən müharibəsi Azərbaycanın şanlı tarixinə qızıl hərflərlə yazıldı. Bu zəfər təkcə işğal altındakı torpaqlarımızın azad olunması deyil, eyni zamanda bütün dünya azərbaycanlıları üçün milli qürurun və birliyin dirçəlişi oldu.
Xalqımızın bu tarixi anlarda yumruq kimi birləşdiyinin şahidi olduq və bu birlik yalnız ölkə daxilində deyil, Güney Azərbaycanda da özünü göstərdi.
İranda yaşayan milyonlarla soydaşımızın Azərbaycan bayrağına göstərdiyi sevgi və sədaqət heç kimə sirr deyil. Onlar üçün üçrəngli bayraq sadəcə bir simvol deyil, azadlıq, milli kimlik və gələcəyə olan inamın təcəssümüdür. Bu sevginin əsas səbəblərindən biri Azərbaycanın güclənən siyasi, iqtisadi və hərbi mövqeyidir. Qarabağdakı qələbə güneyli qardaşlarımıza göstərdi ki, güclü dövlət, milli birlik və qətiyyət öz tarixi haqlarını bərpa edə bilər.
Digər tərəfdən, İran hakimiyyətinin illərlə apardığı assimilyasiya siyasətinə baxmayaraq, güneyli azərbaycanlılar milli kimliklərini qorumağa davam edirlər. Onlar indi daha açıq şəkildə Azərbaycan dilini, mədəniyyətini və tarixini sahiblənir, dövlət bayrağımızı qürurla dalğalandırırlar. Bu, təkcə bir sevgi ifadəsi deyil, həm də mövcud rejimə bir mesajdır: "Biz varıq, biz burdayıq və biz Azərbaycanlıyıq!"
Güney Azərbaycan İcmasının rəhbəri Sayman Aruz Modern.az-a bildirib ki, Azərbaycan bayrağına olan sevgi Azərbaycan milli kimliyinin oyanışının məhsuludur. Bu da təbii ki, Azərbaycan bayrağı altında döyüşən, qələbələr çalan və 200 ildən sonra işğaldan azad edilən vahid dövlətin bayrağının öz soydaşları arasında yaratdığı inam, etibarın məhsuludur:
“Biz bu hadisəni təsadüfi hesab etməməliyik. Bu böyük, uzunmüddətli zəhmətin nəticəsidir. Soydaşlarımız üçrəngli Azərbaycan bayrağına etibar edir və artıq inanır ki, bu bayraq altında həm milli kimliyini qoruya, tarixi torpaqlarını işğaldan azad edə, həm də ana dilini bərpa edib, qoruyacaqlar. Ona görə də Azərbaycan bayrağı Cənubi Azərbaycanda soydaşlarımızın əvəzolunmaz bayrağıdır. Üçrəngli Azərbaycan bayrağını güneyli həmvətənlilərimiz öz bayraqları kimi tanıyır, sevir və qoruyur. Mənim Cənubi Azərbaycanda tanıdığım bütün azərbaycanlıların evində bu bayraq var”.
Reallıq budur ki, bu gün Təbrizdə Azərbaycan bayrağına İran bayrağından daha çox hörmət və ehtiram bəslənir. Bayrağımıza olan bu ehtiramı, onların milli şüurunun daha da güclənməsi və bir millət olaraq öz gələcəklərini böyük Azərbaycan idealında görməsi deməkdir. Bu dalğa hər keçən gün böyüyür və İranda yaşayan milyonlarla soydaşımız üçün yeni bir dövrün başlanğıcını müjdələyir. Tarixin gedişatını dəyişən millətlərin önündə bayraq həmişə yol göstərici olub – və bu gün Azərbaycan bayrağı Güney Azərbaycan türkləri üçün azadlıq və kimlik simvoluna çevrilib.
Əslən Güney Azərbaycandan olan Araz Elsəs isə vurğulayır ki, bu sevgi İran dövlətinin, hakimiyyətinin həm beynəlxalq aləmdə, həm də daxildə getdikcə əhəmiyyətinin azalması, dəyərinin qalmaması, bunun paralelində Azərbaycan dövlətinin günü-gündən güclənməsi, Qarabağ torpaqlarının işğaldan azad edilməsi, Azərbaycan bayrağının daha yüksəklərdə dalğalanması ilə bağlıdır. Hadisələr istər-istəməz Güneydə yaşayan həmyerlilərimizə böyük qürur qaynağına çevrilir. Oradakı insanlar bunları görüb özə - əsl Azərbaycanlı kimliklərinə qayıdırlar. Bu əvvəl də var idi, amma günü-gündən daha da çoxalıdı. Çox yaxın gələcəkdə inanıram ki güneylilər bu sevgini daha qabarıq şəkildə göstərəcək. Bu gün meydanlarda, küçələrdə bayrağımızı görürük, yaxın gələcəkdə isə inanıram ki, millətimiz göstərəcək ki, onun başının üstündə hansı bayraq dalğalanmalıdır.
