Ədalət Partiyası qurultaya hazırlaşır.

Bu barədə Modern.az-a açıqlamasında Ədalət Partiyasının sədr müavini Mütəllim Rəhimli məlumat verib.

O qeyd edib ki, partiya nizamnaməsinə görə sədrin seçilməsi qurultayda həyata keçirilir.

"Buna görə də biz partiya rəhbərliyi yaxın günlərdə toplaşaraq qurultayın keçirilməsi ilə bağlı qərar vermək niyyətindəyik. Partiya rəhbərliyinin qərarı həm qurultayın qərarını, həm də nümayəndəlik normasını müəyyənləşdirəcək. Eyni zamanda onun keçirilməsi üçün qrafik tərtib edəcək. Yalnız bundan sonra Ədalət Partiyasının yeni sədrinin kim olacağı ilə bağlı danışmaq mümkündür. Son qərarı qurultay verir, hesab edirəm ki, qurultaya qədər səbrlə gözləmək lazımdır". - Mütəllim Rəhimli bildirib.

Qeyd edək ki, partiyanın sədri İlyas İsmayılov fevral ayında vəfat edib.

"İlyas müəllimin ən böyük xidmətlərindən biri hüquq sistemində özündən sonra qanunun aliliyini ən üstün hesab edən çoxsaylı kadrlar yetişdirməkdirsə, Ədalət Partiyasında da siyasi partiyanın sədri olmağa qadir insanlar yetişdirib. Eyni zamanda partiyamızın çoxsaylı üzvləri var ki, onlar bu partiyanın sıfırdan qurulmasında iştirak ediblər və partiyanın gələcək taleyi ilə bağlı ən doğru qərarı vermək əzmində və gücündədirlər. Ona görə hesab edirəm ki, Ədalət Partiyasının üzvləri bu partiyanın gələcəyi ilə bağlı İlyas müəllimin qoyduğu xəttə uyğun olaraq ən doğru qərarı qəbul edəcəklər", - partiyanın sədr müavini deyib.

M.Rəhimli qeyd edib ki, namizədlərin kim olduğu hələlik məlum deyil: “Bu təbii olaraq milli-mənəvi dəyərlərimizlə bağlıdır. Yəqin ki, bundan sonra hər kəz öz iddiasını rəsmi şəkildə ortaya qoyacaq. Hesab edirəm ki, bizə bir qədər də zaman lazımdır ki, bu yas əhvalından çıxaq. Ondan sonra Ədalət Partiyası yəqin ki, namizədlərini həm partiya üzvlərinə, həm də cəmiyyətə təqdim edəcək”.

Özünün namizəd olub-olmayacağı ilə bağlı suala sədr müavini belə cavab verib:

“Mən Ədalət Partiyasının qurulmasında və yaranmasında iştirak etmişəm. Hesab edirəm ki, partiya üzvləri də qəbul edər ki, bu partiyada böyük xidmətlərim olub. Əgər partiya üzvləri istəsələr, təbii ki, namizədliyimi irəli sürəcəm. Bu çoxsaylı partiya üzvlərimizdən və rayon təşkilatlarımızdan asılıdır. Təbii ki,mən onlarla məsləhətləşdikdən sonra bu qərarı verməyimin daha doğru olacağını hesab edirəm”-Müsahibimiz bildirib.