Miras məsələləri ilə bağlı notariusa müraciət edən qadın doğum şəhadətnaməsini tapa bilmədiyi üçün dövlət qurumuna müraciət edib və bu zaman adının fərqli olduğunu öyrənib.
Modern.az-ın məlumatına görə, hadisə Naxçıvanda baş verib.
1978-ci ildə Şərurda anadan olan qadının doğum şəhadətnaməsində adı “Sevinc” kimi yazılıb. Amma həyatının sonrakı mərhələsində – şəxsiyyət vəsiqəsində, nikah sənədində, diplomlarında, hətta övladlarının doğum sənədlərində belə o, “Aytən” adı ilə tanınıb.
O, İcra nümayəndəliyinə müraciət edərək səhvin aradan qaldırılmasını xahiş edib. Cavabda isə ona bildirilib ki, bu cür düzəlişlər yalnız məhkəmə qərarı ilə mümkündür.
Aytən xanım hüquqi yolla adını düzəltdirmək qərarına gəlib və Naxçıvan Muxtar Respublikasının İnzibati Məhkəməsinə üz tutub. Məhkəmə prosesi zamanı təqdim olunan sənədlər – şəxsiyyət vəsiqəsi, nikah şəhadətnaməsi, diplomlar və digər rəsmi sənədlər – onun doğma adının “Aytən” olduğunu təsdiqləyib.
Məhkəmə yekunda iddianı təmin edib və Xanlıqlar kənd İcra nümayəndəliyinə 1978-ci ildə aparılmış doğum aktında adın "Sevinc" yox, "Aytən" kimi düzəldilməsini tapşırıb.
