Prokuror külli miqdarda mənimsəmə və vergiləri ödəməkdən yayınmaqda təqsirləndirilən "Güllübulaq" MMC-nin təsisçisi, iş adamı Füzuli Adıgözəlov barədə qərardan narazı olub.

Modern.az-ın məlumatına görə, iş adamına verilə cəzanın ağırlaşdırılması üçün Bakı Apellyasiya Məhkəməsinə müraciət edilib.

Qərara əsasən, iş adamı barədə kassasiya protesti cinayət işi ilə birlikdə Azərbaycan Respublikasının Ali Məhkəməsinə göndərilib.

Qeyd edək ki, təqsirləndirilən şəxs 2011-2015-ci illərdə Türkiyədən müxtəlif məhsullar idxal edib, “Güllübulaq” MMC-yə məxsus 1 milyon 885 min manat hesabına həmin malların dəyərini və gömrük rüsumlarını ödəyib, lakin malların satışından əldə etdiyi gəlirdən Cəmiyyətə ödəniş etməyib.O, həmçinin 2011-2015-ci illər ərzində 8 milyon 396 min manat məbləğində vergini dövlət büdcəsinə ödəməkdən qəsdən yayınmaqda ittiham olunub.

F.Adıgözəlov Bakı Ağır Cinayətlər Məhkəməsinin hökmü ilə 10 il müddətinə azadlıqdan məhrum edilmiş, 2 il sonra Bakı Apellyasiya Məhkəməsinin qərarı ilə ona bəraət verilərək məhkəmə zalından azadlığa buraxılmışdı. Ötən il isə F.Adıgözəlov ittiham olunduğu cinayətlərdə təqsirli bilinərək 5 il azadlıqdan məhrum edilib. O, bəraət aldıqdan 23 ay sonra yenidən cəzaçəkmə müəssisəsinə qaytarılıb.