“Azercell Telekom” MMC-nin, UNICEF Azərbaycanın və “Ümidli Gələcək” Sosial Təşəbbüslər İctimai Birliyinin birgə əməkdaşlığı ilə fəaliyyət göstərən “Azərbaycan Uşaq Qaynar Xətti”nə təzyiq və şiddətə məruz qalan, gündəlik həyatda yaşadığı istənilən sıxıntı səbəbindən dəstəyə ehtiyacı olan uşaqlar, eləcə də övladları ilə bağlı hər hansısa çətinliklə üzləşən minlərlə valideyn müraciət edir. Mərkəz 18 yaşına çatmamış bütün uşaqlara və onların problemləri ilə əlaqədar zəng edən hər kəsə fasiləsiz- 7/24 rejimində xidmət göstərir.

Modern.az 2025-ci ilin ilk 3 ayında "qaynar xətt"ə daxil olan zənglərin sayını öyrənmək üçün “Ümidli Gələcək” Sosial Təşəbbüslər İctimai Birliyinin sədri Kəmalə Aşumova ilə əlaqə saxlayıb.

Onun sözlərinə görə, 2025-ci ilin yanvar-mart ayları ərzində "Azərbaycan Uşaq Qaynar Xətti"nə 940, "Azərbaycan Qadın Dəstək Xətti"nə isə 537 müraciət daxil olub.

K.Aşumova bildirib ki, "uşaq qaynar xətti"nə gələn müraciətlər əsasən psixoloji problemlər, təhsil sahəsini əhatə edən problemlər, sosial sahəyə aid olan problemlər, hüquqi sahədə olan problemlər, səhiyyə problemləri, zorakılıq, erkən nikah ,zərərli vərdişlər, sığınacağa və ya müəssisəyə yerləşdirilmə, boşanma sonrası valideynlərdən 1-i ilə ünsiyyət çətinlikləri, bullinq/qısnama ilə bağlı olub.

"Qadın qaynar xətti"nə gələn müraciətlər isə əsasən məişət zorakılığı, boşanma prosesindəki problemlər, sosial-maddi rifahın aşağı olması, səhiyyə hüququnun təmin edilməsi, hüquqi yardıma ehtiyac, sığınacaqla təmin olunma, psixoloji dəstəklə bağlı olub.