Ölkə ərazisində hələ də təbii yanacaqla təmin edilməyən bölgələr var. Onlardan biri də Lerik rayonudur. Hazırda rayonun 162 yaşayış məntəqəsindən cəmi 61-i qazlaşdırılıb. Geri qalan 101 məntəqə isə qazlaşdırılmayıb.
Rayon sakinləri dəfələrlə "Azəriqaz"a müraciət etdiklərini bildiriblər.
Modern.az məsələ ilə əlaqədar "Azəriqaz"la əlaqə saxlayıb.
Qurumdan sorğumuza cavab olaraq bildirilib ki, Lerik rayonu üzrə 162 yaşayış məntəqəsindən 61 yaşayış məntəqəsi qazlaşdırılıb.
"Qazlaşma tədbirləri birliyin maliyyə imkanları çərçivəsində mərhələli şəkildə davam etdirilir. Birliyin mövcud maliyyə resurslarından səmərəli istifadə olunması, həmin resurslar çərçivəsində əhalinin qaz təchizatı şəbəkəsinə əlçatanlığının təmin edilməsi və daha çox əhalinin qaz şəbəkəsi ilə əhatələnməsi məqsədilə 2021-ci ildən etibarən qazlaşdırılması aparılan bütün yaşayış massivlərində mərhələli şəkildə yalnız daşıyıcı və paylayıcı küçə qaz xətləri çəkilir” - deyə qurumdan bildirilib.
Rəsmi məlumatda 101 kəndin nə vaxt qazlaşdırılacağı açıqlanmayıb.
Zərif Sofiyeva
