20 iyun 2025-ci il tarixdə 1981-ci il təvəllüdlü kişi hər iki gözün zəif görməsi şikayəti ilə Kliniki Tibbi Mərkəzin Oftalmologiya şöbəsinə müraciət edib.
Modern.az-a Kliniki Tibbi Mərkəzinin mətbuat katibi Ruzbeh Məmmədov bildirilib ki, aparılan göz müayinələrindən sonra pasiyentin gözlərində zonulların zəifliyi fakodonezis və arxa subkapsulyar katarakta (göz büllurunun arxa hissəsində, kapsulun altında yaranan bulanıq) diaqnozu qoyulub.
Oftalmologiya şöbəsinin uzman oftalmoloq cərrahı Gülnar Sultanova hər iki gözdə bağ zəifliyi (yüksək miyop) və görmə azlığı olduğu üçün, kapsulanı qoruyaraq katarakta əməliyyatı icra edib. Əməliyyatdan sonra xəstənin gözünə kapsula ringi və göz içi “Alcon” linzası qoyulub. Xəstə əməliyyat sonrası Şöbəyə yerləşdirilib. Kontrol müayinələrdən sonra 100 faiz görmə ilə evə buraxılıb.
Məlumat üçün bildirək ki, fakodonezis zamanı katarakta ilə birlikdə bülluru yerində saxlayan bağlarda zəifləmə olur. Belə xəstələrin əməliyyatı çətinləşir və daha riskli olur. Ən çox psevdoeksfoliativ sindromla birlikdəlik göstərir, xəstənin gözündə həm mirvari suyu, həm də qara su yarana bilir. Bütün xəstəliklərdə olduğu kimi belə ağırlaşmaların qarşısını almaq üçün vaxtında müraciət vacibdir.
Qeyd edək ki, Kliniki Tibbi Mərkəzdə oftalmoloji müayinə və sözügedən mikrocərrahi əməliyyatlar icbari tibbi sığortanın Xidmətlər Zərfi çərçivəsində qarşılanır.
