“Aprelin 21-i Azərbaycan xalqı İslamın iki müqəddəs bayramından biri olan Ramazan bayramını qeyd etdi. Təəssüf ki, hər Ramazan olduğu kimi, bu il də bir sıra dini qruplar bayramın ayın 21-i yox, 22-si olduğunu israrla təbliğ etməyə, insanlar arasında nifaq salmağa çalışdılar”.
Bunu Modern.az-a açıqlamasında Milli Məclisin deputatı, Azərbaycan İlahiyyat İnstitutunun sabiq rektoru Ceyhun Məmmədov Ramazan bayramının fərqli günlərdə qeyd edilməsinə münasibət bildirərkən deyib.
“Təəssüf ki, insanları çaşdıranların arasında məscidlərimizdə imam kimi çalışan, dövlətdən maaş alan din xadimləri də var idi. Bu fətvanın və təlimatın haradan gəldiyi hamımıza məlumdur.
Əslində isə vəziyyət belə idi. Artıq ayın 20-dən insanlarımız böyük çaşqınlıq içində idilər. Bir ay səmimiyyətlə oruc tutan, Allaha dua edən insanlarımız pərişan halında idilər. Hamı etibar etdiyi ilahiyyatçılara, din xadimlərinə zəng edərək: "Sabah oruc tutaq, yoxsa tutmayaq" sualını verirdi”, - deputat qeyd edib.
C.Məmmədov bildirib ki, dinimizə görə, bir müsəlman ölkəsində ay görünsə və ya bayram qeyd olunsa, bütün müsəlmanlar həmin günü bayram günü kimi qeyd edə bilərlər:
“Eyni zamanda dinimiz hər birimizdən dövlətimizin qərarlarına hörmətlə yanaşmağı tələb edir. Bu məsələnin şəri tərəfi.
Eyni zamanda, dinimizə görə, bayram günü oruc tutmaq, müsəlmanların birlik və həmrəyliyini pozmaq, insanlar arasında fitnə-fəsad salmaq böyük günah sayılır. Özünü mömin və müsəlman adlandıran bu insanlar möminlərə hardansa gələn təlimata görə bayram günü oruc tutdurduqlarına, müsəlmanların birlik və həmrəyliyini pozduqlarına görə Allah qatında necə cavab verəcəklər? Allahın qarşısına necə çıxacaqlar? Hesab çox ağır olacaq.
Məsələnin ən ağrılı tərəflərindən biri isə aidiyyəti qurumların bu məslə ilə bağlı sərt mövqeyinin olmaması və müvafiq qərarlar qəbul etməməsi oldu. Onlar bu məsələyə yenə seyrçi qalaraq bir sıra hallarda "onsuz da hər il belə olur" deməklə kifayətləndilər. Azərbaycan dindarı isə həm Qafqaz Müsəlmanları İdarəsindən, həm də Dini Qurumlarla İş üzrə Dövlət Komitəsindən bu məsələ ilə bağlı daha sərt mövqe və qərarlar gözləyirdi.
Eyni zamanda, düşünürəm ki, bayramdan sonra dövlətin, Qafqaz Müsəlmanları İdarəsinin qərar və fitvasına zidd olaraq, bayramın ayın 21-i yox, 22-si olduğunu israrla bildirən məscid imamları ilə bağlı çox sərt qərarlar qəbul edilməli, belə adamların məscidlərimizdə dini fəaliyyətlə məşğul olmasının qarşısı alınmalıdır”.
