Gənclərimizin yad, zərərli ideologiyaların təsiri altına düşməsi hər zaman ölkə rəhbərliyini, gələcəyimizi düşünən hər bir kəsi ciddi narahat edib. NED (Аmerikanın “National Endowment for Democracy”) və EED (“Europеan Endowment for Democracy”) tərəfindən maliyyələşdirilən, beyinlərin yuyulmasına xidmət edən qrant proqramları, layihələr, soros xidmətləri ideoloji mübarizə vasitələridir. Cənab Prezident İlham Əliyev 7 yanvar 2025-ci ildə yerli televiziya kanallarına verdiyi müsahibədə bəzi gənclərin müəyyən xarici dairələr tərəfindən ələ alınması və dövlətçiliyimizə qarşı fəaliyyət göstərməsi haqqında ürək ağrısı ilə danışdı”.
Bunu Modern.az-a açıqlamasında Milli Məclisin deputatı Mehriban Vəliyeva bildirib.
Onun sözlərinə görə, dünyada gənclərə ən çox dəstək verən, ən çox layihə, proqram həyata keçirən Azərbaycan dövlətidir: “Azərbaycan dövlətinin gənclər siyasəti bir çox ölkələr tərəfindən öyrənilir, təqdir və tətbiq olunur. Gənclərimizin sağlam, savadlı və vətənpərvər ruhda formalaşması istiqamətində görülən işlər göz qabağındadır.
Məhz bunun nəticəsidir ki, 44 günlük Vətən müharibəsində gənclərimiz könüllü olaraq hərbi komissarlıqlara gələrək elan olunmuş qismən səfərbərliyə qoşuldular. Onlar müharibədə böyük qəhrəmanlıq, hünər göstərdilər, adlarını tarixə yazdılar. Bütün dünya Azərbaycan gənclərinin vətənpərvərliyinə, igidliyinə, döyüş bacarığına həsəd aparır. Bu gün müharibə gedən əksər ölkələrin gəncləri döyüşmək, öz vətənlərini qorumaq əvəzinə, müxtəlif bəhanələrlə ölkələrini tərk edib başqa yerlərdə sığınacaq axtarırlar.
II Qarabağ müharibəsi zamanı Ermənistanda minlərlə, on minlərlə gəncin fərarilik etməsi faktdır. İllər boyu Azərbaycan dövlətinin apardığı gənclər siyasəti müharibə dövründə özünü doğrultdu. Ermənistandan fərqli olaraq, fərarimiz olmadı. Gənclər öz liderinin-Ali Baş Komandanın ətrafında birləşdi. Ancaq, təəssüflər olsun ki, az sayda olsa da, gənclərimiz arasında xarici ölkələrin təsiri altına düşən, yad, zərərli ideologiyalara xidmət edən, Azərbaycan dövlətinə qarşı çirkin sifarişləri yerinə yetirənlər də var. Cənab Prezidentin də qeyd etdiyi kimi, o gənclərin ideologiyasını Qərb dövlətləri və Qərb təşkilatları həyata keçirdikləri müxtəlif layihə və təlimlər nəticəsində korlayıblar. Məhz buna görə də dövlətimiz Qərbdən gələn qrantlara qadağa qoydu, donor təşkilatların burada fəaliyyət göstərmələrinin qarşısını aldı. Ölkəmizə axıb gələn yad dini-ideoloji baxışların təsiri də az deyil. Yohan Vilhelm Snelmanın dili ilə desək: ” Gənclərin ruhunu işlənməyən tarla kimi buraxsanız, orada tikanlar və gicitkanlar bitər”.
Azərbaycan Avropa İttifaqı ilə proqramların hamısını dayandırdıqdan sonra onlar öz çirkin niyyətlərini Gürcüstan üzərindən ölkəmizə qarşı həyata keçirmək istəyirlər.
Bəzi qeyri-hökumət təşkilarları, media qurumları Tbilisidən maliyyələşməklə anti-Azərbaycan fəaliyyətilə məşğul olurlar. Bəzən sosial şəbəkələrdə Azərbaycan dövlətinə qarşı qarayaxma kampaniyası aparan Ermənistan, Fransa kimi dövlətlərə pərəstiş edən çox az sayda olsa da, gənclərimizi görəndə dəhşətə gəlirsən. Kimsə onları inandırıb ki, guya Ermənistanın baş naziri Nikol Paşinyan, Fransa prezidenti Makron və digərləri demokratdırlar, regionda sülh istəyirlər, biz isə buna imkan vermirik. Özlərinə gah liberal, gah novarçı (müharibə əleyhdarı), gah feminist adları qoyan gənclər də var. NED (Аmerikanın “National Endowment for Democracy”) və EED (“Europеan Endowment for Democracy”) tərəfindən maliyyələşdirilən sözdə qrant proqramlarına cəlb olunan bəzi gənclərin beyinlərini yuyub dövlətimizə, ölkəmizə qarşı qaldırırlar”.
Deputat qeyd etdi ki, hər bir ailə və hər bir təhsil müəssisəsi övladlarımızı azərbaycançılıq ruhunda böyütməlidir: “Azərbaycan gəncinin vətənpərvər, sağlam ruhlu, savadlı, aktiv, hansı ölkədə yaşamasından asılı olmayaraq, millətinin təəssübünü çəkən, milli dəyərlərə bağlı olması bizim görmək istədiyimiz azərbaycanlı gəncinin modelidir. Qərbin hər cür təhdidinə duruş gətirən ölkəmiz övladlarımızın manqurtlaşmasına imkan verməyəcək. Bunları nəzərə alaraq Avropa İttifaqı ilə proqramlar dayandırılıb, Avropa İttifaqının leqal olan qrantlarının hamısı dondurulub. Onlar ərazimizdə gələcəyə, əsasən gənclərə istiqamətlənmiş öz platformalarının yaradılmasına nail ola bilməyəcəklər. Bütün bunlar dövlət səviyyəsində nəzarətdə saxlanır.
Cənab Prezident hər çıxışında gənc nəslin tərbiyəsində ailənin və məktəbin rolunu xüsusi vurğulayır.
Ümummilli lider Heydər Əliyevin dili ilə desək: “Cəmiyyətin gələcək tərəqqisi bir çox cəhətdən indi gənclərimizə nəyi və necə öyrətməyimizdən asılı olacaqdır”. Milli təhsilimizin vətəndaş tərbiyəsi məsələsi hər zaman olduğu kimi bu gün də vacib dövlət siyasətidir. Yeni dövrün çağırışları fonunda milli dəyərlərə sadiq, vətənpərvər gənclərin tərbiyəsi gələcəyimizin təminatı üçün vacibdir. Xaricdə təhsil almağın əleyhinə deyilik, ancaq xaricdə təhsil alanların da dövlətimiz, xalqımız qarşısında ən azından mənəvi öhdəlikləri var. Onlar dünyanın istənilən yerində Azərbycanı təmsil edərək vətənimizə, xalqımıza xidmət etməlidirlər ”.
