Azərbaycan Respublikasında 2025-ci il yanvarın 29-na təyin edilmiş bələdiyyə seçkilərinin təşviqat mərhələsi çərçivəsində Şabran rayonu, Şabran bələdiyyəsi üzrə Yeni Azərbaycan Partiyasının (YAP) namizədlərinin seçicilərlə görüşü keçirilib.

Modern.az xəbər verir ki, görüşdə YAP Şabran rayon təşkilatının sədri Mehdi Balabəyov çıxışında ölkəmizdə bələdiyyələrin yaranma tarixi barədə məlumat verib.

Çıxış edən Milli Məclisin deputatı Mahir Süleymanlı qeyd edib ki, Cənubi Qafqazın ən böyük siyasi təşkilatı olan YAP ümummilli maraqların reallaşması yolunda böyük tarixi nailiyyətlər qazanıb: “Məhz bunun nəticəsi olaraq partiyamızın sıraları ildən-ilə genişlənir. Yeni Azərbaycan Partiyası, həmçinin Ulu Öndər Heydər Əliyevin ideyalarına sadiq olan insanları birləşdirən partiya kimi səciyyələnir”.

Seçki qərargahının üzvü Seymur Qədəşov və Şabran bələdiyyəsi üzrə namizədlər Elvin Hüseynov, Əmircan Ocaqov, İkram Kərimov bildiriblər ki, əhaliyə göstərilən xidmətlərin keyfiyyətinin artırılması və vətəndaş məmnunluğunun təmin edilməsi üçün yerli idarəetmə orqanlarının səmərəli fəaliyyəti önəmlidir. 

Vurğulanıb ki, bu məqsədlə müasir texnologiyaların tətbiqi və resursların düzgün idarə olunması xüsusi əhəmiyyət daşıyır.
Seçici Feyruz Əmiraslanov və digərləri YAP-ın fəaliyyətini dəstəklədiklərini vurğulayıblar.