Hər il fevralın 26-da Azərbaycan xalqı Xocalı qurbanlarını yad edir, Xocalı abidəsinə ziyarət edilir. Son 30 ildə Azərbaycan dövləti və vətəndaş cəmiyyəti Xocalı soyqırımı həqiqətlərinin beynəlxalq aləmdə tanıdılması üçün genişmiqyaslı işlər aparıb.
Xüsusilə, Avropa, ABŞ, Türkiyə, Pakistan və digər ölkələrdə Xocalı soyqırımı ilə bağlı yürüşlər, mitinqlər, anım mərasimləri və konfranslar keçirilir.
Bu tədbirlərdən biri də 2004-cü ildə Brüsseldə keçirilib.
Tədbirin təşkilatçısı, Milli Məclisin deputatı Fatma Yıldırım olub. O, Avropada yaşadığı illərdə Avropa Azərbaycanlıları Mərkəzi adlı diaspor təşkilatına rəhbərlik edirdi.
Fatma Yıldırım Modern.az-a açıqlamasında deyib ki, 2004-cü ilin fevralında Xocalı faciəsinin 12-ci ildönümü ilə bağlı Brüssel şəhərində, Avropa Parlamentinin binasının qarşısında, Şuman meydanı yaxınlığında aksiya keçirilib.
"Tədbirdə Xocalı soyqırımı haqqında Azərbaycan, türk, ingilis, fransız dillərində çıxışlar edildi, Avropa Parlamentinə doğru yürüş keçirildi, faciə ilə bağlı deklarasiyalar ictimaiyyətə paylanıldı. Aksiyada Avropadakı Türk icması da fəal iştirak etdi. Biz bu aksiya ilə yerli ictimaiyyətin diqqətini cəlb edə bilmişdik. Hələ o zaman ən böyük istəyimiz bu idi ki, Xocalı qətliamını törədən canilər öz layiqli cəzalarını alsınlar”, - o deyib.
Həmin görüntüləri təqdim edirik:
