Qazaxıstan, Türkmənistan və Özbəkistanın Kiprin yunan tərəfinə səfir təyin etməsi birmənalı qarşılanmayıb. Qazaxıstan bu istiqamətdə ilk rəsmi addımı atan ölkə olub, 2025-ci ilin yanvarında Kipr ilə qarşılıqlı səfir təyinatını həyata keçirib. Özbəkistan isə artıq 1997-ci ildən diplomatik münasibətdə olduğu Kiprə ilk dəfə rəsmi səfir təyin edib. Türkmənistan da martın 31-də İtaliyadakı səfirini Kiprə akreditə edib.
Türkiyə tərəfi hələlik məsələyə rəsmi münasibət bildirməyib. Qeyd edək ki, Şimali Kiprin müstəqilliyini tanıyan yeganə ölkə Türkiyədir.
Ekspertlər Mərkəzi Asiyanın 3 ölkəsinin Kiprlə bağlı qərarının Avropa İttifaqının yardımı ilə əlaqələndirir. Avropa İttifaqı Mərkəzi Asiya ölkələrinə 12 milyard avroluq yardım vəd edib.
Türk dövlətlərinin Kipr qərarı Azərbaycanda da reaksiyalara səbəb olub.
Prezident İlham Əliyev isə ADA Universitetində keçirilən konfrans zamanı Şimali Kiprə dəstək ifadə edib. Dövlətimizin başçısı əlavə edib ki, Azərbaycanın siyasəti hər zaman aydın olub: “Şimali Kiprdəki qardaşlarımızı əmin etmək istəyirəm, biz hər zaman sizinlə olacağıq ki, ölkəniz müstəqil dövlət kimi təsis edilsin və beynəlxalq ictimaiyyət tərəfindən tanınsın”.
Modern.az-a açıqlamasında Azərbaycan-Türkmənistan Parlamentlərarası İşçi Qrupunun sədri Tənzilə Rüstəmxanlı qərarı Türk dünyasını vurulan "böyük zərbə" kimi qiymətləndirib.
"Türkmənistan bu məsələlərdə hər zaman çox uzaqda durur. Bu ölkə Türk dünyası, Türk Dövlətləri Təşkilatının toplantılarına məsafəlidir, soyuq münasibəti var. Mən bununla bağlı yazı yazdım, etirazımı bildirdim. Türkmənistan hər zamankı ampluasında, yəni soyuq münasibətdə idi. Amma Özbəkistan və Qazaxıstan türk dünyasının içərisində olan, Azərbaycan və Türkiyə ilə gözəl münasibətləri olan ölkələrdir. Türkiyə və Azərbaycanın mövqeyini bildikləri halda bu cür addım atmaqları, əlbəttə, türk dünyasına vurulmuş böyük zərbədir. Sadəcə Türkmənistanın yox, Çingiz Aytmatov kimi milli düşüncə adamını, Oljas Süleymanov kimi yazarı yetişdirən bir millətin aydınlarının susmağı məni narahat etdi və mən onlara “niyə susursunuz, niyə ictimai rəy formalaşdırmadınız” deyə müraciət etmişəm. Həqiqətən mi, Aytmatovun, Oljas Süleymanovun davamçıları yoxdur ki, ictimai rəy formalaşdırıb, reaksiya göstərsin? Bu nə qərardır? Yaxşı Avropa Birliyində Yunan Kiprini tanıyırsınız, onda elə Şimali Kipri də tanıyın. Axı bizim üçün ən önəmli olan Türk dövlətidir. Ona münasibətdə bu qədər xəyanətkar yol tuta bilməzsiniz. Yeni-yeni Özbəkistan və Qazaxıstanla ciddi münasibətlər qurulurdu. Bundan sonra, özəlliklə də, Türkmənistanla ciddi münasibətlər qurulmalıdır. Mənim, yəqin ki, parlamentlərarası dostluq qrupunun sədri kimi onlara müraciətim olacaq".
T.Rüstəmxanlı Azərbaycanın Şimali Kiprdə təmsilçilik aça biləcəyini qeyd edib:
"Azərbaycan Şimali Kipr Türk Respublikasının müstəqilliyini hələki tanımır. Amma birmənalı orada təmsilçilik aça bilir. Buna mane ola biləcək heç nə yoxdur. Bu,əlbəttə,ölkə başçısının qərarından və iradəsindən asılıdır. Azərbaycan dövləti yetərincə Şimali Kipr Türk Cümhuriyyətinin arxasında durdu. Cənab Prezidentin açıqlamasını hamımız gördük. Biz sonuna qədər onların yanındayıq. Bir tək Türkiyə bu məsələdə belə aydın və ürəkli mövqe ortaya qoyar. Azərbaycan qardaşlığın və bir millət olmağın vəzifələrini həyata keçirir".
Azərbaycan-Özbəkistan Parlamentlərarası İşçi Qrupunun sədri Eldar İbrahimov isə bu məsələ ilə bağlı hər hansı fikir bildirməyin indiki halda düzgün olmadığını söyləyib: "Nəsə fikir bildirmək üçün tezdir. Ortalığı durulmağını gözləmək daha doğru olar".
