Mayın 10-u Azərbaycan mədəniyyəti üçün unudulmaz tarixə çevrildi. Otuz il həsrətində olduğumuz Ağdamda Muğam Mərkəzinin açılışı baş tutdu. Mərasimdə təkcə bir binanın qapıları açılmadı - 30 ilin nisgili, yurd həsrəti, qürur göz yaşlarına qarışdı.
Prezident İlham Əliyev və birinci xanım Mehriban Əliyevanın iştirakı ilə keçirilən tədbirdə "Qarabağ şikəstəsi"nin ifa olunması isə ən təsirli an idi.
Ağdam Muğam Mərkəzinin açılışında deputat Aqil Abbas da iştirak edib. Təəssüratlarını Modern.az-a danışan millət vəkili Ağdamda ciddi bərpa-quruculuq işlərinin aparılıdığını deyib:
"Mən dəfələrlə Ağdama getmişəm. Ayda təxminən 3-4 dəfə rayonda oluram. Şəhərdə böyük tikinti-abadlıq işləri aparılır. Elə yollar çəkilir ki, Ağdamda 200 il tıxac olmayacaq. İnfrastruktur qurulur, evlər tikilir. Bir yaşayış massivi hazırdır, indi ikinci, üçüncü yaşayış massivləri tikilir. Cənab Prezident Dəmir yolu vağzalının da açılışını edib. Kəngərli kəndinə sakinlər köçürüldü. İndi Xıdırlıya sakinlərin geriqayıdışını təmin etməyə hazırlaşırlar. Şəhərə də ilin axırında yəqin ki, müəyyən qədər adam köçürə biləcəklər. Tam rəqəmi deyə bilmərəm, ancaq bu baş tutacaq. Sıfırdan böyük, möhtəşəm şəhər tikilir. İki otel və bir konqres zalı var. Üçüncü otel də tikilir".
"Ağdam muğamın mərkəzidir"
"Muğam Mərkəzinin Ağdamda tikilməsi sevindirici haldır. Özü də Prezident mərkəzin açılışını Ulu öndərin doğum günündə etdi. O, əvvəlcə Şuşaya getmişdi, oradan da Ağdama gəldi. Mayın 10-da - Ümummili liderin doğum günündə Muğam Mərkəzinin açılışını etdi. Prezidentimiz son illər ad günlərini Qarabağda əhalinin arasında qeyd edir. Bu dəfə də atasının doğum günündə xalqla bir yerdə oldu. Möhtəşəm bir konsert keçirildi. Möhtərəm Prezident ünsiyyətcil adamdır. Elə şərait yaratdı ki, hər kəs ürəyindən keçəni deyə bilsin. Hamı bir dost kimi açıq danışa bildi. O, uşaqlar "Qarabağ şikəstəsi"ni oxuyanda kövrəldi. Açılış mərasimində 300-ə yaxın ağdamlı, incəsənət xadimləri, bəstəkarlar, şairlər iştirak edirdi".
"Prezident həmişə məni diqqətdə saxlayır"
Deputat Prezidentlə görüşündən də danışıb:
"Cənab Prezident məni həmişə diqqətdə saxlayır. O, Şuşada da mənimlə görüşdü. Getdiyi yerdə məni görüb dayandı, hal-əhval tutdu və soruşdu: "Ağdamda nə var nə yox, ora gedirsənsə, birlikdə gedərik".Dedim ki, bəli, gedirəm. Ağdamda görüşəndə də dedim: "Cənab Prezident, yenə bu şəhərdə görüşdük. Siz bütün Qarabağı yenidən tikirsiniz, bütün bu şəhərlər İlham Əliyevin şəhərləridir”".
"Balaca xanəndələri dinləyəndə yadıma "Qarabağ bülbülləri" düşdü"
"Onları dinləyəndə Murad Rzayevin yaratdığı “Qarabağ bülbülləri" ansamlı yadıma düşdü. Gözəl də oxudular. Deməli, hələ "Qarabağ bülbüllləri" yaşayır. Ağdamda muğam ölməyib, yaşayır, yaşadılacaq da".
