“Azərbaycan Respublikasının 2024-cü il dövlət büdcəsinin icrası haqqında” qanun layihəsi və Azərbaycan Respublikasının 2024-cü il dövlət büdcəsinin icrasına dair illik hesabat “Büdcə sistemi haqqında” AR-nın Qanuna uyğun olaraq Milli Məclisə təqdim edilmişdir. Həm layihə, həm də hesabat lazımi məlumatları əhatə etməklə qanuna müvafiq qaydada tərtib olunub.
Modern.az xəbər verir ki, bunu Milli Məclisin deputatı Rövşən Muradov “Azərbaycan Respublikasının 2024-cü il dövlət büdcəsinin icrası haqqında” qanun layihəsinin müzakirəsi zamanı çıxışında bildirib.
“Qanun layihəsi və hesabat tərəfimizdən Hesablama Palatasına rəy üçün təqdim edilmiş və bu rəy palata tərəfindən Milli Məclis üzvlərinə təqdim edilib.
2024-cü ilin dövlət büdcəsi Azərbaycan Respublikasının Prezidenti cənab İlham Əliyevin müəyyən etdiyi strateji inkişaf prioritetləri, sosial-iqtisadi siyasət, müdafiə və təhlükəsizlik çağırışları istiqamətləri ilə uzlaşdırılaraq qlobal iqtisadiyyatda gedən proseslərin, regionda baş verən hadisələrin və işğaldan azad edilmiş ərazilərdə bərpa və quruculuq işlərinin icmal və dövlət büdcələrinin əsas parametrlərinə ehtimal olunan təsirləri nəzərə alınmaqla icra edilib.
Təqdim olunmuş sənədlər Milli Məclisin İqtisadi siyasət, sənaye və sahibkarlıq komitəsinin 27 may 2024-cü il tarixli iclasında ətraflı müzakirə edilmişdir.
Bildiyiniz kimi, 2024-cü il ölkəmiz üçün siyasi müstəvidə çox əhəmiyyətli tarixi hadisələrlə əlamətdar olmuşdır. Belə ki, ölkəmizin bütün suveren ərazisində Azərbaycanın öz müstəqilliyi tarixində ilk dəfə olaraq fevralın 7-də növbədənkənar prezident seçkiləri, sentyabrın 1-də isə VII çağırış Milli Məclisə növbədənkənar seçkilər keçirilmişdir.
Demokratik inkişaf tariximizə yeni uğur səhifəsi kimi yazılan prezident və parlament seçkilərinin nəticələri xalqımızın Ulu öndər Heydər Əliyev yoluna sədaqətini, Prezident İlham Əliyevin uğurlu və məqsədyönlü siyasətinə inam və etimadını bir daha nümayiş etdirməklə bərabər, ölkə başçısının sədri olduğu Yeni Azərbaycan Partiyasına birmənalı dəstəyinin növbəti təzahürü oldu.
Ötən ildə ölkənin dövlət büdcəsinin gəlirləri yuvarlaq olaraq 37,2 mlrd. manat (37 milyard 164,2 milyon manat), xərcləri isə 37,7 mlrd.manat (37 milyard 719,7 milyon manat) təşkil etmişdir. Bu göstərici 2023-cü illə müqayisədə müvafiq olaraq 5,5 % və 3,5 % çoxdur. Yeri gəlmişkən 2024-cü ildə büdcə kəsiri 555,5 mln. manat olmaqla, ÜDM-in 0,4 %-ini təşkil etmişdir. Yeni reallıqlar nəzərə alınaraq, ötən ildə də iqtisadiyyatın şaxələndirilməsi, qeyri-neft-qaz məhsullarının ixracının genişləndirilməsi və biznes mühitinin yaxşılaşdırılması istiqamətində tədbirlər davam etdirilmişdir. Belə ki, ölkə üzrə iqtisadi artım 4,1 faiz, illik inflyasiya 2,2 faiz, tədiyyə balansının saldosu müsbət 4,7 mlrd. dollar olmaqla, qeyri-neft-qaz sektoru üzrə 6,2 faiz, neft-qaz sektoru üzrə isə 0,3 faizlik real artım qeydə alınmış, adambaşına düşən ÜDM-in həcmi isə real ifadədə 3,6 faiz artmaqla 12,4 min manat təşkil etmişdir.
Böyük Qayıdışa dair I Dövlət Proqramına uyğun olaraq işğaldan azad olunmuş ərazilərin yenidən qurulması və bərpası üçün 2024-cü ildə 5,3 mlrd. manatdan çox vəsait ayrılmışdır ki, bu da infrastruktur təyinatlı layihələrin tikintisinə və yenidən qurulmasına, müdafiə və hüquq mühafizə təyinatlı obyektlərin tikintisinə və təmirinə, sosial təyinatlı layihələr üzrə xərclərə yönəldilib.
Çıxışımın sonunda qeyd etmək istəyirəm ki, gələcəkdə büdcənin gəlir və xərclərinin daha dəqiq planlaşdırılması, onun daha səmərəli icrası üçün qüvvədə olan qanunvericilik bazasının təkmilləşdirilməsinə, maliyyə nəzarəti tədbirlərinin və intizamının daha da gücləndirilməsinə, büdcə xərclərinin icrasının səmərəlilik və nəticəlilik əsasında qiymətləndirilməsi istiqamətində yeni yanaşmalara ehtiyac vardır”,-deputat əlavə edib.
