Bakıda Qərbi Azərbaycan İcmasının “Qayıdış hüququ – Ermənistandan zorla çıxarılan Azərbaycanlılar üçün ədalətin təmin edilməsi” mövzusunda II beynəlxalq konfransı keçirilib.

 

Tədbirdən sonra Modern.az-ın suallarını cavablandıran Türkiyə Böyük Millət Məclisinin üzvü, Türkiyə-Azərbaycan parlamentlərarası dostluq qrupunun sədri Şamil Ayrım bildirib ki, beynəlxalq ictimaiyyətin Qərbi Azərbaycan məsələsinə həssas yanaşması üçün belə konfranslara ehtiyac var.

 

"Bu məsələ ilə bağlı cənab Prezident İlham Əliyevin tapşırıqları olduqca vacibdir. Qərbi Azərbaycandan olan insanların öz istəklərilə ləyaqətli şəkildə evlərinə qayıtması, oradakı mədəniyyət xəzinəsinin qorunması, insanların ailələrinin, yaxınlarının məzarlarını ziyarət etmələri, ibadətlərini öz məscidlərində rahatlıqla icra etmələri fundamental insan hüquqlarıdır. Beynəlxalq ictimaiyyətin bu məsələyə həssas olması üçün belə konfranslar keçirilir. Qərbi Azərbaycan İcmasına, onun sədri Əziz Ələkbərli çox gözəl bir konfrans təşkil ediblər. Burada əsas qayə beynəlxalq ictimaiyyətin oyanması ilə bağlıdır. BMT, İnsan Haqları Məhkəməsi, UNESCO, Avropa Parlamenti və digər hər bir beynəlxalq təşkilat bu işlərə isti baxmalıdır. Çünki bu məsələdə haqlı mövqedə olan Azərbaycandır. Ermənistan məsələni yanlış anlamamalıdır. Bunun onlara qarşı torpaq tələbi olduğunu düşünməməlidir. Azərbaycanın belə bir torpaq tələbi yoxdur. Əslinə qalsa, həmin torpaqların hamısı Azərbaycanındır. Lakin yenə deyirəm ki, bu gün Azərbaycanın belə bir tələbi yoxdur. Sadəcə qaçqın düşən insanların ləyaqətli şəkildə öz yurdlarına qayıtması tələb olunur”,-o deyib.

 

Sonda Ş.Ayrım söyləyib ki, Türkiyə bu gün də, sabah da hər zaman olduğu kimi Azərbaycanın hər işində yanında olacaq.