Azərbaycan Milli Elmlər Akademiyasında Qərbi Azərbaycan Ensiklopediyasının hazırlanması ilə bağlı qərar qəbul edilib. Bəs bu ensiklopediyada nə əks olunacaq? Ensiklopediya çap formatda, yoxsa elektron variantda olacaq?
Mövzu ilə bağlı Modern.az-ın suallarını Qərbi Azərbaycan İcması İdarə Heyətinin sədri, Milli Məclisin deputatı Əziz Ələkbərli cavablandırıb.
Onun sözlərinə görə, Qərbi Azərbaycan coğrafiyasına daxil olan ərazilər son qarışına qədər Azərbaycanın tarixi torpaqlarıdır və Qərbi Azərbaycan arealı bütövlükdə ümumazərbaycan etnomədəni sisteminin tərkib hissəsidir:
“Ona görə də bu ərazilərin tarixi, coğrafiyası, maddi və mənəvi dəyərləri və s. ilə bağlı hər şey Azərbaycan elmi-ictima-siyasi fikrinin maraq dairəsindədir. Təbii ki, belə olan təqdirdə Qərbi Azərbaycan Ensiklopediyasının nəşri vacib məsələdir. Həm də bu, təkcə Qərbi Azərbaycan İcmasının məsələsi yox, bütövlükdə Azərbaycan elminin məsələsidir. Təsadüfi deyil ki, bu işin icrası AMEA-nın "Azərbaycan Milli Ensiklopediyası" Elmi Mərkəzinə həvalə edilib. Hazırda hər bir ensiklopediyanın yazılışında olduğu kimi, Qərbi Azərbaycan Ensiklopediyasının da yazılışının ilkin mərhələsində onun sözlüyünün hazırlanması prosesi gedir və bu işə AMEA-nın rəhbərliyi tərəfindən AMEA-nın bütün elmi-tədqiqat institutları səfərbər edilib. Bu günlərdə sözlüyün ilkin varintı Qərbi Azərbaycan İcmasına təqdim edilib və İcmanın Elm Komissiyası tərəfindən nəzərdən keçirilib. Hazırda sözlük Elm Komissiyasının alt komissiyalarında təkmilləşdirilmə mərhələsindədir”.
Millət vəkili qeyd edib ki, ensiklopediya spesifik sahədir, bura daxil edilən məsələlərin seçimində və oçerklərin yazılışında ciddi tələblər mövcuddur:
“Azərbaycan Milli Ensiklopediyasında hazırda bu sahədə kifayət qədər peşəkar kollektiv fəaliyyət göstərir. Ona görə də hələlik təkcə bunu deyə bilərəm ki, hər bir ensiklopediyada hansı məsələlər ehtiva olunursa, Qərbi Azərbaycan Ensiklopediyasında da həmin məsələlər öz əksini tapacaq. O ki qaldı bu ensiklopediyanın nəşr məsələsinə, şübhəsiz ki, bu, həm də strateji məsələ olduğu üçün, mütləq çoxcildlik şəklində və tələbata uyğun olaraq kütləvi tirajla çap ediləcək”.
