Bakı-Qroznı reysini yerinə yetirən “Embraer 190” tipli sərnişin təyyarəsinin qəzaya uğraması nəticəsində həlak olan üç ekipaj üzvü - gəmi komandiri İqor Kşnyakin, pilot Aleksandr Kalyaninov və stüardessa Hökümə Əliyeva bu gün - dekabrın 29-da II Fəxri xiyabanda dəfn olunub.

Dəfn mərasimində dövlət və hökumət rəsmiləri, ictimaiyyət nümayəndələri iştirak ediblər.

Dəfndə iştirak edən bəzi şəxslər hisslərini Modern.az-la bölüşüblər.

Pilot İgor Kşnyakinin övladlarının müəllimi Rəna Kərimova faciəsən sarsılsığını bildirib:

i

-  Mən Kşnyakinin övladlarının müəlliməsi olmuşam. Onlar hər zaman rəqsə, rəsmlərə gedərdilər. Onun övladları çox fəal uşaqlardır. O qədər yaxşı valideyn idi ki, övladlarını hər yerə aparardı. Həyat yoldaşı da olduqca yaxşı anadır. Biz bu xəbəri eşidəndən özümüzə gələ bilmirik. Çünki əlimizdən heç nə gəlmir. İqor Kşnyakin məhv olacağını, ölümə getdiyini bildiyi halda insanları xilas etmək üçün əlindən gələni etdi. Qızları rusdilli ailədə doğulsalar da, Azərbaycan dilini də çox yaxşı bilirlər. Səhnədə Azərbaycanca danışırdılar. Bizim bir qızımız rusca bilmirdi. İqorun qızı onun yanında oturub dil öyrədirdi. Onlar Azərbaycanı çox sevirlər. Kşnyakinin  qızları bizim gözümüzün qarşısında böyüyüblər. Onların ən çox sevdiyi rəqs Azərbaycan rəqsləri olub. Həmçinin beynəlxalq festivalda Azərbaycanımızı layiqincə təmsil ediblər. Qızlar canlılara qarşı ürəyiyumşaq biridirlər. Çünki onların atası onları belə böyüdüb. Çox təəssüf. Bu gün bura gəlməyi özümüzə borc bildik. İqor Kşnyakin tək övladlarının deyil, hamımızın qəhrəmanına çevrildi.
 

Qəza nəticəsində həyatını itirən qəhrəmanları son mənzilə yola salan, azyaşlı Dadaş Mirzəzadə söyləyib ki, İqor Kşnyakinin övladları çox şanslıdırlar:

- Pilotlarımız və təyyarə bələdçisi Hökümə xanım əsl qəhramandılar. Biz onları daim xatırlayacağıq. Mən bu hadisəni öyrənəndə çox pis oldum. İqor Kşnyakinin övladlarl çox şanslıdırlar ki, belə bir ataları olub. Allah rəhmət eləsin. Onlar hamımızın qəhrəmanıdırlar.
 

Fəxri Xiyabana ziyarətə gələn Əli Azərli qeyd edib ki, Hökümənin "Hər şey yaxşı olacaq!" çağırışına heyran qaldığı üçün buradadır: 

- Hökümə xanımın “Hər şey yaxşı olacaq!” çağırışına heyran qalıb gəlmişəm. Artıq 3-cü gündür ki, bura gəlirəm. Bundan sonra vətənimiz, dövlətimiz üçün çox şeyin yaxşı olmağını arzulayıram. Bütövlükdə Azərbaycan xalqına başsağlığı verirəm. 
 

Hökümə Əliyevanın bibisi Kifayət Yusifova deyib ki, o, 12 yaşından hüquqşunaslığa qəbul olmaq istəyirdi:
 

- Deyirdi ki, beynəlxalq hüquqşunaslığı bitirib yüksək vəzifələrdə işləyəcəm. Qardaşımın qızı qəhrəmandır. O,  bütün dünyaya səs saldı. Hökümə soisla şəbəkələrdə status paylaşmağı sevməzdi. Deyərdi ki, buni niyə edirsiniz... İndi artıq bütün dünya onun rəsmini paylaşır. Bütün dünyaya səsini yayır... 
 

Hökümənin digər bibisi Əminə Yusifovanın sözlərinbə görə, qardaşı qızı hər kəsin sevimlisi oldu:
 

- Mən onunla qürur duyuram. O, qəhrəman qız idi, həmişə hamıya can yandırırdı. İşini çox sevirdi, heç vaxt şikayət etmirdi. Hər dəfə harasa uçanda, evdəkilər çox narahat olurdu, amma heç vaxt onun ölümü haqqında düşünməmişdik, bu gün isə ağlımıza gəlməyən faciəni yaşayırıq. Onun dəfninə şahidlik etmək bizim üçün çox çətindir.
 

H.Əliyevanın dəfndə iştirak edən üçüncü bibisi Şəhla Əliyeva onunla fəxr etdiyini dilə gətirib:

- Qardaşımın övladı ilə fəxr edirəm. O cəsur qız kimi nümunə oldu. Özü şəhidliyə yüksəldi, amma neçə insanın həyatını xilas etməyi bacardı. Hökümə daim ürəyimizdə yaşayacaq. Ruhu şad olsun.
 

Qəhrəmanlarımızı ziyarət edən tək onların yaxınları deyildi. Onları özlərinə doğma bilən hamı bu "üçlüy"ü son mənzilə yola salmaq üçün Fəxri xiyabana gəlmişdi.

Kəlbəcər sakini Tahirə Verdiyeva bu yükün bütün Azərbaycan üçün çətin olduğunu vurğulayıb.

- Xalq olaraq birlik nümayiş etdirib hər zaman özümüzü dünyaya sübut etməliyik. Qoy bilsinlər, nə qədər ki, Azərbaycan xalqı var, bizə heç kim heç nə edə bilməyəcək! Biz nə qədər şəhid oğlu və qızı olan bir xalqıq. Bu,  bizim ən böyük təsəllimizdir. Vətənin vətən olması üçün biz şəhid verməliyik. Bu gün də növbəti şəhidlərimizi  son mənzilə yola salırıq. Onlar ölümsüzlüyü qazandılar. Dünya fanidir və hər birimiz bir gün gedəcəyik.
 

Milli Qəhrəman Şahlar Şükürovun bacısı Həqiqət Şükürova çox hüznlü olduğunu söyləyib:

-Ökəmiz üçün ağır faciədir. Dünyasını dəyişən qəhrəmanlara, eyni zamanda digər vətəndaşlara Allahdan rəhmət, yaxınlarına səbr diləyirəm. AZAL-ın pilotlarının göstərdiyi bu böyük qəhrəmanlıq dillərə dastan oldu. Hökümə bütün Kəlbəcərin fəxridir. Hər birimiz Hökümənin valideynlərinin yanındayıq. Həmçinin pilotlarımızın qəhrəmanlığı bu gün şagirdlərimizə örnək olacaq bir addımdır. Ölkəmizin Prezidenti cənab İlham Əliyevi Allah qorusun. Onun dik duruşu nəticəsində Rusiya prezidenti Vladimir Putin faciə ilə bağlı üzr istədi.
 

Dəfn mərasimində iştirak edən Hökümə Əliyevanın yaxın qohumu Teymuraz Əliyev dünyasını dəyişənlərə Allahdan rəhmət diləyib:

- Onun vaxtsız vəfatına görə çox təəssüflənirəm. Hökümə həqiqətən fitri istedada malik xanım idi. Universitetə hazırlaşdığımız dönəmlərdə Hökümənin istənilən mövzusunu mənimsəmə qabiliyyətinə şahid olmuşam. Xarici dili mükəmməl səviyyədə bilirdi. Xalqımızın başı sağ olsun!
 

Ziyarətçi Suğra Əliyeva Hökümə Əliyevanın əmisi nəvəsi olduğunu söyləyərək, Azərbaycan xalqına dərin hüznlə başsağlığı verib:

“Bu xəbəri eşidən zaman hamı kimi mən də pis oldum. Çünki bizim üçün ağır və gözlənilməz xəbər oldu. Allah rəhmət eləsin. Yeri cənnət məkan olsun!.