Azərbaycanda məktəbəqədər təhsil müəssisələrinin sertifikasiyaya cəlb edilməsi planlaşdırılır. Bu barədə məlumatı elm və təhsil naziri Emin Əmrullayev verib. 

 

"Biz ilk dəfə olaraq məktəbəqədər təhsil müəssisələrində diaqnostika həyata keçirdik. Məqsədimiz 2014-2015-ci ildən başlayaraq məktəbəqədər təhsil müəssisələrində əvvəlcə diaqnostika, sonra isə sertifikasiya prosesini tətbiq etməkdir. Hazırda diaqnostik mərhələni başa çatdırmışıq və növbəti illərdə məktəbəqədər təhsil müəssisələrinin sertifikasiyaya cəlb edilməsi planlaşdırılır", - nazir bu gün Bakıda keçirilən beynəlxalq konfransda bildirib.

 

O qeyd edib ki, bu prosesin əmək haqqı sisteminə də müəyyən təsir göstərəcəyi gözlənilir: "Hazırda bununla bağlı konkret qaydalar olmasa da, gələcəkdə oxşar məntiqin məktəbəqədər təhsildə də tətbiq ediləcəyini düşünürük".

 

Qeyd edək ki, Azərbaycanda 1800-dən artıq bağça fəaliyyət göstərir. 

 

Modern.az-a açıqlamasında Elm və Təhsil Nazirliyi yanında İctimai Şuranın üzvü Rasif Dünyamalıyev deyib ki, bu gün Emin Əmrullayev tərəfindən məktəbəqədər təhsilə göstərilən yanaşma, indiyə qədər heç bir nazirin dövründə olmayıb:

 

"Mikayıl Cabbarovun zamanında məktəbəqədər təhsil müəssisələri 10 il müddətinə gəlir vergisindən azad edilmişdi. Onun dövründə məktəbəqədər təhsilə olan yanaşmaya ilk addım atıldı. Məhz bu addımın nəticəsi idi ki, özəl uşaq bağçalarının sayı 148-ə çatıb və artan tendensiya ilə davam edir. Bu yanaşmanın davamı olaraq özəl sektor və dövlət arasında əməkdaşlığın təməli atıldı. Hər kəs artıq qəbul edir ki, məktəbəqədər təhsil təhsilin təməlidir. Burada doğru qərarlar verilsə, ümumitəhsildə və ali təhsildə də ciddi dəyişikliklər baş verəcək”.

 

R.Dünyamalıyev qeyd edib ki, məktəbəqədər təhsil verənlərin diaqnostikasının keçirilməsi vacib addımdır: “Bu sahə uzun müddət diqqətdənkənar qaldığı üçün oradakı bilik və bacarıqları haqqında kifayət qədər məlumat yoxdur. Diaqnostika məktəbəqədər təhsillə bağlı vəziyyətin nə yerdə olduğunu müəyyən etməyə imkan verəcək. Bu baxımdan Emin Əmrullayevin çıxışı çox vacibdir”.

 

Müsahibimiz onu da bildirib ki, bağça müəllimlərinin sertifikasiya imtahanlarının önümüzdəki il keçirilməsi gözlənilmir:

 

“Bu imtahanlar yəqin ki, 2026-cı ildə keçiriləcək. Çünki diaqnostikadan sonra birbaşa sertifikasiyaya keçid çox çətin ola bilər. Amma ümumilikdə baxsaq, məktəbəqədər təhsildə çalışan işçilərin əməkhaqqı çox aşağıdır. Onların maaşı minimum əməkhaqqı səviyyəsindədir. Qaydalara görə, orada 2 tərbiyəçi və 1 texniki işçi çalışır. Tərbiyəçilər 2 növbə işlədiyi üçün əməkhaqqı onlar arasında bölüşdürülür. Bu çətinlik yaradır, ona görədə nizamlamaya ehtiyac yaradır. Ya bağçaların iş saatı dəyişdirilməli, ya da əməkhaqqı artırılmalıdır. Açıq deyək ki, bu gün 350-400 manata işləmək çox çətindir. Nəzərə alın ki, 20 uşaqla 1 tərbiyəçi 1 dayə işləyir. Bunlar nəzərə alınmalı və müvafiq tədbir görülməlidir”.