“Biznesin məqsədi istehlakçıdan daha çox gəlir götürməyə çalışmaqdır. Ona görə də marketlərdə uşaqlara aid oyuncaqların, yaxud müxtəlif yeyinti məhsulları məhz aşağı hissələrdə yerləşdirilməsi bu istəyə uyğunlaşdırılmış hərəkətlərdir”.
Bunu Modern.az-a açıqlamasında Azad İstehlakçılar Birliyinin (AİB) sədri Eyyub Hüseynov deyib. “Bilinən bir şeydir ki, uşaq marketə daxil olarkən, qaçıb özünə aid olan bir şeyi götürür və valideyni onu almağa vadar edir. Bu market siyasətinin növlərindən biridir. Bu siyahını uzatmaq da olar. Hələ bir çoxlarımız cavab verməyə çətinlik çəkirik ki, nə üçün saat reklamlarını 22:15-də qoyurlar, nə üçün qiymətləndirmə zamanı yuvarlaq rəqəmlərdən istifadə edilir və s. Bunlar hamısı istehlakçı düşüncəsinə təsir etmək üçün istifadə edilir. O cümlədən də malların yerləşdirilməsi məsələsində istər Azərbaycanda, istərsə də dünyada vahid standartı yoxdur. Hər bir biznes sahibi malları öz obyektində istədiyi kimi yerləşdirmək iqtidarındadır”.
