Buraxılış imtahanlarının tarixi artıq abituriyentlərə məlumdur. Keçən il keçirilən buraxılış imtahanlarında 53 nəfər maksimal bal toplayaraq ən yüksək nəticə göstərib.

Ekspertlər bu göstəricini imtahanlar asan olması ilə əlaqləndirib. Bəs bu il gözləntilər nələrdir?

Modern.az mövzu ilə bağlı elm və təhsil ekspertləri Elçin Süleymanovun və Rizvan Fikrətoğlunun fikirlərini öyrənib.

Elçin Süleymanovun sözlərinə görə,  buraxılış imtahanları demək olar ki, keçən ilki təqvimə uyğun şəkildə elan olunub:

“Bu il ümumi olaraq nəticələrin əvvəlki illərə görə daha yaxşı olacağını proqnozlaşdırmaq olar. Çünki hər il göstəricilər əvvəlki ilə görə biraz daha yaxşı olur. Bunun obyektiv və subyektiv səbəbləri var. Məktəblərdə maddi-texniki bazanın inkişafı və yenilənməsi, eyni zamanda müəllimlərin sertifikasiya sonrası həvəsləndirilməsi prosesi, direktorların seçimi, regional təhsil idarələrinin və Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin yaradılması və digər dəyişikliklər son illərdə təhsilin keyfiyyətinə təsir göstərdiyini düşünürəm. Birdən-birə inqilabi dəyişiklik gözləməyin real olduğuna inanmıram. Amma nisbətən göstəricilərin yaxşılaşmasını əvvəlcədən proqnozlaşdırmaq olar”.

E. Süleymanov bildirib ki, əvvəlki illərdə pandemiya və digər səbəblər şagirdlərin göstəricisinə təsir edirdi:

“Bu il demək olar ki, sakit bir ildir. Ölkəmizdə yalnız COP zamanı qısa müddətli distant təhsilə keçid oldu. Ümumi olaraq isə təhsil prosesi normalara uyğun keçdi. Əvvəlki ilə görə gözləntim müsbətdir, çünki şagirdlərin oxuma həvəsi, rəqabət mühiti, ixtisas və peşə seçimindəki həvəsi get-gedə artır. Xaricdə təhsil üzrə Dövlət Proqramı vasitəsilə kifayət qədər dünyanın reytinqli universitetlərinə Azərbaycan gəncləri oxumağa gedir. Əvvəl 500-1000 nəfər arasında belə qəbul sayı 1-2 nəfər idisə, indi onlarla, hətta 100-dən çox olur. Bu da orta təhsildə keyfiyyətin artmasının nümunəsidir”.

Rizvan Fikrətoğlu da bu ilki gözləntilərin müsbət olduğunu bildirib:

“Universitetdə plan yerləri artırılıb, əlavə olaraq ali təhsil müəssisələrində 7 ixtisas yaradılıb ki, bu ixtisaslar bu günün tələbinə uyğun ixtisaslardır. Düşünürəm ki, builki imtahan modeli də keçən ilki ilə oxşar olacaq. Abiturityentləri ən çox düşündürən mövzu balların artma ehtimalıdır. Düşünmürəm ki, keçən ilki qədər artım baş versin. Amma müəyyən ixtisaslarda artma ehtimalı ola bilər. Hazırda heç bir imtahan olmayıb deyə əldə əsas olmadan konkret fikirlər çox çətindir, demək olar ki, mümkünsüzdür. Sadəcə təcrübəyə əsaslanaraq müəyyən fikirlər bildirmək olar”.