Yəqin ki, hamımız Türkiyədə attestatla universitetə qəbul barədə eşitmişik. Bəzən Azərbaycanda ali təhsil müəssisələrinə qəbul oluna bilməyən abituriyentlər qardaş Türkiyədəki universitetlərə üz tuturlar.
Eyni zamanda bu gün Azərbaycanda da minlərlə türkiyəli tələbə təhsil alır. Satatistikaya görə, hazırda ölkəmizdə 4500-ə yaxın türkiyəli tələbə oxuyur. Bəzi iddialara görə, həmin tələbələr arasında da öz ölkəsində universitetə qəbul oluna bilməyib Azərbaycana üz tutanlar da var. 

Modern.az mövzu ilə bağlı deputatlar Ceyhun Məmmədov və Elnarə Akimovanın fikirlərini öyrənib.

C.Məmmədov bildirib ki, Azərbaycandan Türkiyəyə gedən, yaxud oradan ölkəmizə gələnlərin hamısının bu niyyətdə olduğunu deyə bilmərik. Deputat qeyd edib ki, oxumağa gələnlərin əksəriyyəti intellekt baxımından öndə gedən gənclərdir:

“Amma reallıqdır ki, bu gün həm Azərbaycandan Türkiyəyə gedən, yaxud Türkiyədən gələn tələbələr arasında  bu cür gənclər var. Bu təkcə türkiyəli deyil, başqa əcnəbi ölkədən olan tələbələrə də aiddir.
Ölkəmizdə ali məktəbə qəbul olunmayan bəzi zəif göstəricili gənclər Türkiyədə oxuyurlar. Bu gün Türkiyədə 50 minə yaxın tələbə təhsil alır. Bu çox böyük statistikadır, biz də bu barədə düşünməliyik. Türkiyədən bura tələbələr gəlirlər, onların da bir hissəsi öz ölkələrində təhsil almaq imkanına malik olmadıqlarına görə belə seçim ediblər. Bu gün ölkəmizdə 10 minə yaxın əcnəbi tələbə təhsil alır. Biz çalışmalıyıq ki, Türkiyədən, Orta Asiyadan ölkəmizə gəlib təhsil alan gənclər artsın. Bu təbii ki, əlaqələrimizin də inkişafına öz töhfəsini verəcək”.

Elnarə Akimova da qeyd edib ki, sözügdən iddia hər kəsə aid edilə bilməz:

“Buradan Türkiyəyə gedən, yaxud Türkiyədən buraya gələn tələbələrin hamısına dediyiniz iddianı aid etmək  olmaz. Mənə elə gəlir ki, hər bir halda ilkin göstərici öz ölkəmizdə qazanılmalıdır. Bəzi azərbaycanlı tələbələrin Türkiyəyə attestatla oxumağa getdiyi kimi, eyni şəkildə bəzi türkiyəli tələbələrin də ölkəmizə bu şəkildə gəlməsi mümkün haldır”.