DİM martın 2-də tam (11 illik) orta təhsil səviyyəsi üzrə buraxılış imtahanı keçirib.

Modern.az-ın məlumatına görə, imtahandan sonra sosial şəbəkələr və mətbuatda buraxılış imtahanında riyaziyyat fənni üzrə istifadə edilən suallardan birinin plagiat olduğu barədə iddialar yayılıb.

Dövlət İmtahan Mərkəzi məsələyə münasibət bildirib. Qurumnda verilən açıqlamada deyilir ki, buraxılış imtahanında riyaziyyat fənnindən istifadə edilən bütün tapşırıqlar ingilis bölməsi üzrə imtahan verən abituriyentlər üçün də həmin dillərə tərcümə edilərək təqdim edilib.

"İngilis bölməsi üzrə imtahan verən abituriyentlərin birinin sual kitabçasından götürülmüş bir tapşırığın sosial media platformalarında yayılması bu qaydadan məlumatsız olan bəzi şəxslər tərəfindən həmin tapşırığın xarici mənbədən götürüldüyü kimi başa düşülüb.

Bir daha bildiririk ki, tapşırığın orijinal mətni Azərbaycan dilindədir və həmin tapşırıq yalnız ingilis bölməsi üzrə imtahan verən abituriyentlər üçün tərcümə edilib. Sosial mediada yayılan görüntü də hansısa xarici mənbə olmayıb, məhz DİM-in keçirdiyi imtahanda istifadə edilən sual kitabçasından götürülüb", - açıqlamada bildirilib.

Qeyd edək ki, sualın plagiat olduğu barədə iddia yayan təhsil eksperti Kamran Əsədov paylaşımı silub.