Bakı Apellyasiya Məhkəməsi Baku Oksford Məktəbinə dair iddiaya baxıb.

Hakim Faiq Qəniyevin sədrlik etdiyi məhkəmə heyəti Prezident Administrasiyasının sabiq rəhbəri Ramiz Mehdiyevin qızı Kamilə Əliyevanın Baku Oksford Məktəbində pay sahibi olduğuna dair iddiasını rədd edib.

Eyni zamanda məktəbin təsisçisi Mehriban Məmmədovanın əmlak üzərində mülkiyyət hüququ da tanınmayıb.

Qeyd edək ki, Bakı Oksford Məktəbi 1998-ci ildən fəaliyyət göstərir.

Məktəbin qurucusu Nailə Rzayeva və həyat yoldaşı Tofiq Rzayev, eyni zamanda iş adamı Rasim Məmmədov olub.

Sonralar Bakı Oksford Məktəbi Rzayevlərin əlindən zorla alınıb. Ardınca məktəbə “Baku Steel Company"nin keçmiş rəhbəri, hazırda həbsdə olan iş adamı Rasim Məmmədov və Ramiz Mehdiyevin ailəsi sahiblənib. Məktəbin təsisiçisi kimi sənədlərdə Rasim Məmmədovun həyat yoldaşı Mehriban Məmmədova göstərilib.

Rasim Məmmədov Dövlət Təhlükəsizliyi Xidməti (DTX) tərəfindən həbs ediləndən sonra Baku Oksford Məktəbi də dövlətin nəfinə müsadirə olunub.

Modern.az-ın məlumatına görə, Bakı Apellyasiya Məhkəməsinin son qərarından sonra Bakı Oksford Məktəbinin qurucusu olmuş Nailə Rzayeva sosial şəbəkədə məsələyə münasibət bildirib.

"Mənim və mərhum həyat yoldaşım Tofiq Rzayevin 26 il əmək sərf etdiyi, sonralar isə həyasızcasına mənimsənilmiş Bakı Oksford Məktəbi görünür ki, heç kimə qismət olmayacaq. Çox ümid edirəm ki, dövlətimiz qanunsuz olaraq mənimsənilmiş məktəbi geri alacaq. Təhsil mütəxəssislər tərəfindən aparılmalıdır", - deyə N.Rzayeva qeyd edib.

Bakı Oksford Məktəbində təhsil ingilis dilindədir. Təhsil müddəti 12 ildir. Məktəbdə həm milli, həm də beynəlxalq təhsil standartlarını özündə əks etdirən müasir proqram həyata keçirilir.