Ali təhsil müəssisələrinin məzunlarının əmək bazarına inteqrasiyası, təkcə təhsilin uğuru deyil, həm də ölkənin iqtisadi inkişafı və insan kapitalı siyasətinin effektivliyini əks etdirən mühüm göstəricidir. Universitetlərin məzunları ixtisaslarına uyğun şəkildə işlə təmin olunmadıqda, bu, həm təhsil sistemindəki struktur problemlərə, həm də əmək bazarındakı balanssızlığa işarə edir. Azərbaycanda son illər sözügedən sahədə müəyyən addımlar atılsa da, müxtəlif universitetlər üzrə məzunların işlə təminat göstəriciləri arasında ciddi fərqlər müşahidə olunur.
Dövlət Məşğulluq Agentliyi tərəfindən hazırlanan “Məzunların məşğulluq reytinqi” platformasında 2018-2022-ci illər arasında Azərbaycanda fəaliyyət göstərən universitetlərin məzunlarının əmək bazarındakı yeri ilə bağlı məlumatlar dərc edilib.
Qeyd edək ki, platforma universitetlərin özləri tərəfindən təqdim edilən məlumatlar əsasında hazırlanıb. Hesablama şəxslərin məzun olduqdan sonra iki il ərzində ilk əmək müqaviləsi əsasında aparılıb.
Modern.az bu dəfə Azərbaycan Mədəniyyət və İncəsənət Universitetinin (ADMİU) məzunları ilə bağlı vəziyyəti araşdırıb.
Məlumata görə 2018-2022-ci ildə məzun olanların ümumi sayı 1270-dir, onlardan 726-sı və ya 57 faizi işlə təmin olunub. İşləyən məzunların 59 faizi qadın, 41 faizi isə kişidir.
Məzunların əksəriyyəti aylıq gəliri 400 manat olan iş yerlərində çalışır. İşlə təmin olunanların əsas hissəsi özəl sektorda fəaliyyət göstərirlər. Belə ki, qeyri-dövlət sektorunda çalışan məzunlar, ümumi məzunların 68.6 faizini təşkil edir.
Ən çox məzunu olan ixtisas aktyor sənəti və dizayn sahəsindəndir. Belə ki, sözügedən illər ərzində hər iki ixtisas üzrə 115 nəfər məzun olub. Aktyor sənəti üzrə oxuyan 70 (60 faiz), dizayn sahəsi üzrə oxuyan 63 məzun (55 faiz) işlə təmin olunub.
Digər ixtisaslar üzrə vəziyyət aşağıdakı kimidir:
Muzeyşünaslıq, arxiv işi və abidələrin qorunması – 95 məzunun 63-ü işlə təmin olunub.
Sənətşünaslıq – 94 məzunun 56-sı işlə təmin olunub.
Təsviri incəsənət müəllimliyi – 72 məzunun 49-u işlə təmin olunub.
Sosiologiya – 67 məzunun 39-u işlə təmin olunub.
Sosial iş – 61 məzunun 35-i işlə təmin olunub.
Kinoşünaslıq – 57 məzunun 38-i işlə təmin olunub.
Teatrşünaslıq – 55 məzunun 25-i işlə təmin olunub.
İnstrumental ifaçılıq (fortepiano, violonçel və s.) – 51 məzunun 33-ü işlə təmin olunub.
Məzunlar əsasən ixtisaslaşdırılmamış mağazalar, restoranlar, teatr və konsert zallarında, incəsənətin müxtəlif sahələri üzrə fəaliyyət göstərirlər.
