Martın 9-da keçirilmiş buraxılış imtahanının nəticələri elan olunub. İmtahan iştirakçıları arasında 20 nəfər 300 bal toplamaqla ən yüksək nəticəni göstərib. Onlardan 10-u qız, 10-u oğlandır.
300 bal toplayanlardan biri Sadıqzadə Nuray Cəlal qızıdır. O, Bakı şəhərində yerləşən 138 saylı orta məktəbdə təhsil alır.
Məktəbli Modern.az-a açıqlamasında bildirib ki, imtahanda özündən yüksək nəticə gözləyirmiş:
"Amma 300 bal mənim üçün gözlənilməz oldu. Sınaqlarda da yüksək nəticələr yığırdım. 1-ci sinifdən bu vaxta qədər hər zaman çox məsuliyyətli və çalışqan şagird olmuşam. Qiymətlərim hər zaman 5 olub".
Abituriyent qeyd edib ki, Türkiyənin qabaqcıl universitetlərinin birində tibb təhsili almaq istəyir və bu üzrə hazırlaşır: "Boş vaxtlarımda rəsm çəkməyi sevirəm. Gələcək planlarım çoxdur. Yaxşı bir tibb təhsili alib, ölkəmdə işləyib, millətimə yararlı bir övlad olmaq istəyirəm".
300 bal toplayan digər abituriyent isə Bakı şəhəri 313 nömrəli tam orta məktəbin şagirdi Fərid Mehdiyevdir. O bildirib ki, "şübhəli" olaraq dəyərləndirdiyi bir neçə açıq tipli test tapşırığı olduğu üçün 300 bal nəticəni gözləməyib:
"Ona görə də ümumi gözləntim 290 - 295 bal arasında idi. Amma, sevindirici haldır ki, cavablarım düzgün və ümumi balım 300 bal oldu. Hazırlaşmaq üçün fərqli bir üsulum yox idi, hər bir abituriyent kimi müəyyən bir plan üzrə gündəlik öhdəliklərimi yerinə yetirir, əlavə sual tipləri ilə tanış olur, təkrarlara isə böyük önəm verirdim. Ümumiyyətlə, DİM vəsaitlərini prioritetləşdirirdim və əsas planımı onlar üzərində qururdum".
O qeyd edib ki, əsas hədəfi Bakı Ali Neft Məktəbində "İnformasiya Təhlükəsizliyi" üzrə təhsil almaqdır:
"Düzdür, həmin universitet yüksək giriş ballarına görə tanınır, ancaq başlıca məqsədim ora qəbul olmaqdır. 700 bal toplayın toplamayacağımı bilmərəm. Nəzərə almaq lazımdır ki, buraxılış imtahanında 300 bal toplamağım mənim üçün gözlənilməz idi və blok imtahanında daha çətin tipli tapşırıqlardan istifadə olunur. Ümid edirəm ki, blok imtahanından da maksimal balı toplayaram"
Məktəbli sonda abituriyentlərlə öz məsləhətlərini bölüşüb:
"Əvvəlcə, əlbəttə, dərslərə çox ciddi və planlı şəkildə yanaşmaq lazımdır. Xüsusilə DİM vəsaitlərinə böyük önəm vermək çox əsasdır, çünki imtahan DİM tərəfindən tərtib edilir. Mən, qətiyyən, bütün günü intensiv şəkildə çalışmağı tövsiyə etmirəm. Mənim fikrimcə, qısa, amma effektiv şəkildə çalışmaq daha önəmlidir. Önəmli olan davamlılıq və əzmdir. Bu ikisi vasitəsilə uğur qazanmamaq mümkünsüzdür"
