Dövlət İmtahan Mərkəzi tərəfindən hər il ümumi (9 illik) və tam (11 illik) orta təhsil səviyyəsi üzrə buraxılış imtahanı keçirilir. İmtahan ölkə üzrə keçirilir. Şagirdlərin yoxlanılması mərhələli şəkildə baş tutur, respublika üzrə 9-cu siniflər üzrə 3, 11-ci siniflər üzrə isə əsasən 2 buraxılış imtahanı keçirilir. Buraxılış imtahanlarının cavabları isə 1 aydan tez olmayaraq 6 həftə içində bilinir.
Modern.az xəbər verir ki, Dövlət İmtahan Mərkəzinin sədri Məleykə Abbaszadə imtahan cavablarının gec elan edilməsi ilə bağlı Baku Tv-ə müsahibəsi zamanı aydınlıq gətirib.
Onun sözlərinə görə işin texniki tərəfi nə qədər tez zamanda yekunlaşsa da, marker müəllimlərin sayının kifayət qədər olmaması prosesi gecikdirir:
“Hələ 2013-cü ildə müəllimlərin qurultayında çıxış edəndə qeyd etmişdim ki, bizə çoxlu səriştəsi olan müəllimlər lazımdır. Hansı ki, onlar yazı işlərini meyyarlara uyğun yoxlamağı bacarsınlar. Biz həmin ildən hər il açıq elan edirik ki, kim bu prosesdə iştirak etmək istəyirsə, bizim kurslara yazılsın, imtahandan keçsin və markerlər siyahısına daxil olsun”.
M. Abbaszadə bildirib ki, hazırda 1000, müəyyən hallarda 1200 markerlər DİM-də işləyir, amma bu say çox azdır:
“Hər imtahan 100 min işin texniki tərəfi - skan olunması və o tapşırıqlara, imtahanlara aid meyarların hazırlanması təxminən 1 həftə - 10 gün çəkir. Bundan sonra yoxlanma prosesi müəllimlərin sayından aslıdır. Bizdə imtahan nəticələrini yoxlamağı bacaran 10 min riyaziyyat, 10 min ana dili müəllimi olsa, iş daha tez həyata keçirilə bilər”.
“İlk illər müəllimləri dəvət edirdik, bizim kompüterlərin arxasında oturub, nəticələri yoxlayırdılar. İndi isə Dövlət İmtahan Mərkəzinin mütəxəssislərinin müəllifi olduğu tam müasir platformamız var. O platformanı biz bütün dünyada göstəririk, bunun üçün bizə müraciət edənlər də var. Bu platforma ilə müəllim öz evində oturub sualları yoxlayır. Elə müəllim var 5000 sual yoxlayır, eləsi var 40 sual yoxlayır. Nə qədər çox sual yoxlayırsa, o qədər də məvacib alır. Bu prosesə nə qədər müəllim qoşulsa, nə qədər müəllimin bilik və bacarığı bu sahədə yüksək olsa, proses də o qədər tez gedə bilər. İndiki sayla bu 1 ay, 6 həftə vaxt aparır”- deyə qurumun sədri bildirib.
