Azərbaycan Respublikası Kənd Təsərrüfatı Nazirliyi və İsrailin Arava Beynəlxalq Kənd Təsərrüfatı Tədris Mərkəzi (AICAT) tərəfindən aqrar sahədə fəaliyyət göstərən gənc mütəxəssislər üçün elan edilən təcrübə proqramının seçim turu başa çatıb.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən Modern.az-a bildirilib ki, iki mərhələli seçim əsasında imtahanlardan uğurla keçən 40 nəfər İsrailin Arava bölgəsində təcrübə keçmək imkanı qazanıb.
Kənd təsərrüfatı naziri Məcnun Məmmədov təcrübə proqramının 2022-2023-cü il üzrə məzunları və təcrübə proqramında iştirak etmək hüququ qazanmış gənc mütəxəssislərlə görüşüb.
Görüşdə nazirliyin gələcək fəaliyyət istiqamətləri, aqrar sahə qarşısında duran prioritetlər haqqında məlumat verilib, məzunların təcrübələri dinlənilib, iştirakçıların sualları cavablandırılıb və aqrar sahədə İsrail təcrübəsinin dərindən öyrənilməsi tövsiyə edilib.
Qeyd edək ki, təcrübə proqramının müddəti 11 aydır. Proqram çərçivəsində gənc mütəxəssislər 10 ay ərzində İsrailin fermer təsərrüfatlarında təcrübə keçəcəklər. Eyni zamanda, proqram iştirakçıları 1 ay müddətində həm aqrar, həm də iqtisadi sahədə akademik təlimlərdə iştirak edəcəklər. Təcrübə proqramı 2023-cü ilin avqust ayından 2024-cü ilin iyul ayınadək davam edəcək.
